කොලොම්බියාවේ වයඹදිග චෝකෝ ප්‍රදේශයේ නායයෑම් හේතුවෙන් පුද්ගලයින් 37 දෙනෙකු මිය ගොස් තිබෙනවා.
තුවාල ලැබූ සංඛ්‍යාව කොපමණ දැයි මෙතෙක් අනාවරණ වී නොමැති බවයි විදෙස් මාධ්‍ය වාර්තා කළේ.
ක්විබ්ඩෝ සහ මෙඩෙලින් නගර අතර මාර්ගයක මෙම නායයෑම් සිදුවී ඇති බව කොලොම්බියාවේ උප ජනාධිපති ෆ්‍රැන්සියා මාකේස් සිකුරාදා ප්‍රකාශ කර තිබෙනවා.
එම ප්‍රදේශයට පැය 24ක පමණ කාලයක් පැවති අඛණ්ඩ අධික වර්ෂාපතනයකින් පසුව මෙම නාය යාම් සිදුවී ඇතැයි සඳහන්.
මෙඩලින් සහ ක්විබ්ඩෝ නගර සම්බන්ධ කරන මාර්ගයේ නායයෑම් කිහිපයක් සිදුවී තිබෙනවා. ප්‍රදේශයේ නගරාධිපතිවරයා පැවසුවේ ඇතැම් පුද්ගලයින් තවමත් සුන්බුන් අතර සිරවී සිටින බවයි.
පැසිෆික් සාගරයට මායිම්ව පිහිටි චොකෝ පළාතේ මෙම ප්‍රදේශය දැඩි වනාන්තරවලින් වැසී ඇති අතර ගත වූ පැය 24 තුළ සැලකිය යුතු වර්ෂාපතනයකට ගොදුරු වී තිබෙනවා.
කොලොම්බියාව මීට පෙරද මෙවැනි නාය යාම්වල‍ට ලක්වී තිබෙනවා. 2017 වසරේදී පැවති ධාරානිපාත වර්ෂාවෙන් පසු මොකෝවා නගරය හරහා මඩ ප්‍රවාහයක් යාමෙන් රටේ දුරස්ථ දකුණු ප්‍රදේශයක සිය ගණනක් මිනිසුන් මිය ගියා.
