පසුගිය 31 වැනිදා චාවකච්චේරිය පොලිස් වසමේ නාවක්කුලි ප්රදේශයේ පැවති සංගීත සංදර්ශනයකදී තහනම් සංවිධානයක් වන එල්.ටී.ටී.ඊ. සංවිධානය නැවත ප්රර්වර්ධනය වන අයුරින් ගීත ගායනා කල බවට, සමාජ මාධ්ය ඔස්සේ ප්රචාරය වීමක් සිදු වන බවට ලද තොරතුරක් අනුව යාපනය කොට්ඨාස අපරාධ විමර්ශන කාර්යංශය මඟින් විමර්ශනයක් ආරම්භ කර තිබෙනවා.
මෙම ගීත ගායනය සිදු කිරීම සම්බන්ධයෙන් උදයනගර්, කිලිනොච්චිය ප්රදේශයේ පදිංචි වයස අවුරුදු 24 ක් වන පුද්ගලයෙකු පෙරේදා (02) දින අත්අඩංගුවට ගෙන ඇති අතර වැඩිදුර විමර්ශනයේදී මොහු විසින් ඉහත දින පැවැති සංගීත ප්රසංගයේදී ගායනා කරන ලද ගීත දෙකක් මොහුගේ සමාජ මාධ්ය ගිණුමක එල්.ටී.ටී.ඊ. සංවිධානය ප්රවර්ධනය වන ලෙස යම් ආකාරයකට සංස්කරණය කර, ඔහු විසින්ම ගීතය හඬ කවා ඔහුගේ සමාජ මාධ්ය ගිණුමේ උඩුගත කර ඔහු විසින් ප්රචාරය කිරීමට ඉඩ සලස්වා ඇති බව අනාවරණය වී ඇති බව පොලිසිය පවසනවා.
මෙය 1978 අංක 48 දරන ත්රස්තවාදය වැලැක්වීමේ පනතේ 3 උ වගන්තිය ප්රකාරව දඬුවම් ලැබිය හැකි වරදක් බැවින් සැකකරු ඊයේ (03) දින චාවකච්චේරි මහේස්ත්රාත් අධිකරණයට ඉදිරිපත් කිරීමෙන් පසු ලබන 17 වන දින දක්වා රක්ෂිතබන්ධනාගාර ගත කර තිබෙනවා.
