කූඨ ලෙස සකස් කළ ග්රීක වීසා භාවිත කර යුරෝපය වෙත පළා යාමට පැමිණි ව්යාපාරික පවුලක් ගුවන් තොටුපොළ පිටත්වීමේ පර්යන්තයේ ඊයේ (24) ආගමන විගමන දේශසීමා ආවේක්ෂණ ඒකකයේ නිලධාරීන් විසින් අත්අඩංගුවට ගෙන තිබෙනවා.
සාමාජිකයින් සිව්දෙනෙකුගෙන් සමන්විත මෙම පවුල රුපියල් එක්කෝටි හතලිස් ලක්ෂයක මුදලක් තැරැව්කරුවෙකුට ගෙවා අදාළ ව්යාජ ග්රීක වීසා සකසාගෙන ඇති බවයි වාර්තා වන්නේ.
මෙලෙස අත්අඩංගුවට පත්ව ඇත්තේ නාත්තන්ඩිය ප්රදේශයේ පදිංචි පවුලක්.
මෝටර් රථ අලෙවි කිරීමේ ව්යාපාරික කටයුතුවල නිරත මෙම පවුලේ පියා 43 හැවිරිදි වියේ, මව 47 හැවිරිදි වියේ පසුවන අතර පුතුන් දෙදෙනා 21 සහ 16 යන වයස්වල පසුවනවා.
යුරෝපා රටවලට තානාපති කාර්යාලවල පවතින අධික කාර්යය බහුලත්වය හේතුවෙන් එම රටවලට අදාළ වීසා නිකුත් කිරීම “ගෝලීය වීසා පහසුකම් සැළසීමේ සේවාව ” නැමැති ආයතනය මඟින් සිදුකරනවා.
තැරැව්කරු විසින් මෙම ව්යාපාරිකයා ඉන්දියාවේ පිහිටි මෙම ආයතනයේ කාර්යාලය ඉදිරිපිටට කැඳවා ගෙන ගොස් පොරොන්දු මුදල ලබාගෙන මෙම ව්යාජ වීසා බලපත්ර ලබා දී ඇති බවයි අනාවරණය වී ඇත්තේ.
මෙම ව්යාපාරික පවුල ඊයේ (24) පස්වරු 05.00ට බහරේන් බලා පිටත්ව යාමට නියමිත ගල්ෆ් ගුවන් සේවයේ ජී.එෆ්.- 145 දරණ ගුවන් යානයට පිවිසීම සදහා කටුනායක ගුවන් තොටුපොළ වෙත පැමිණ තිබුණා.
ඔවුන් පළමුව බහරේන් නුවර වෙත ගොස්, වෙනත් ගුවන් යානයකින් ග්රීසියේ ඇතැන්ස් නුවර වෙත යාමටයි සැළසුම් කර තිබුණේ.
අත්අඩංගුවට ගැනුණු ව්යාපාරිකයා පවසා ඇත්තේ තමන්ට මෙම ග්රීක වීසා බලපත්ර සකස් කර දුන් තැරැව්කරු තවත් 20 දෙනෙකුට ද මේ ආකාරයට මුදල් ලබා ගෙන එම වීසා ලබාදුන් බවයි.
අත්අඩංගුවට ගැනුණු මෙම පවුලේ සාමාජිකයින් වැඩිදුර විමර්ශන කටයුතු සදහා කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් වෙත භාර දී තිබෙනවා.
