සත්කාරක නවසීලන්තය දෙවැනි පන්දුවාර 20 ක්‍රිකට් තරගයේ දී ශ්‍රී ලංකාවට එරෙහිව කඩුලු 05ක් දැවී ලකුණු 186ක් ලබා ගත්තා.
අද (30) තරගය මවුන්ට් මෞන්ගනුයි හිදී ආරම්භ වූයේ කාසියේ වාසිය ශ්‍රී ලංකාවට හිමිකර දෙමින්.
ඒ අනුව නායක අසලංක තීරණය කළේ පළමු ව පන්දු යැවීමටයි.
ශ්‍රී ලංකා පන්දු යවන්නන් ඇතැම් අවස්ථාවල පීඩනකාරී පන්දු යැවීමක් දියත් කළ ද, නවසීලන්ත පිතිකරුවන් ඊට අවනත නොවී වේගවත් පිතිහරඹයක ද නිරත වුණා.
නවසීලන්තය වෙනුවෙන් මාර්ක් චැප්මන් ලකුණු 42ක් සහ ටිම් රොබින්සන් ලකුණු 41ක් ලබාගත්තා.
මිචෙල් හයි නොදැවී ලකුණු 41ක් රැස් කළා.
කඩුලු බිඳ දැමීමේ දී වනිඳු හසරංග කඩුලු 02ක් සහ මතීෂ පතිරණ හා නුවන් තුෂාර එක් කඩුල්ල බැගින් බිඳ හෙලුවා.
ඒ අනුව තීරණාත්මක දෙවැනි තරගය ජය ගැනීමට ශ්‍රී ලංකා කණ්ඩායම පන්දු 120ක දී ලකුණු 187ක් ලබාගත යුතුයි.
මේ වන විට තරගාවලියේ තරග 1-0ක් ලෙස නවසීලන්තය ඉදිරියෙන් සිටිනවා.
