මෝටර් රථ ආඥා පනතට පිටින් කටයුතු කර පෞද්ගලික බස් රථ වර්ජනයක් ඇතිවන තත්ත්වයට පත් නොකරන ලෙස පුද්ගලික බස් සංගම් පොලිසියට අනතුරු අඟවනවා.
ලංකා පෞද්ගලික බස් හිමියන්ගේ සංගමය පවසන්නේ ‘ක්ලීන් ශ්‍රී ලංකා’ වැඩසටහන යටතේ බස් රථ සඳහා සිදුකරන මෙහෙයුම්වල ගැටළු පවතින බවයි.
එම සංගමයේ සභාපති ගැමුණු විජේරත්න සඳහන් කළේ එම ගැටලු සම්බන්ධයෙන් සාකච්ඡා කිරීමට සඳහා එළඹෙන සතියේ වැඩබලන පොලිස්පතිවරයා හමුවන බවයි.
ඒ වන තෙක්; ලබන සතියේ සිදුකිරීමට සැලසුම් කර තිබූ බස් වර්ජනය තාවකාලිකව අත්හිටුවන බවයි ඔහු වැඩිදුරටත් සඳහන් කර සිටියේ.
රජය විසින් ආරම්භ කළ ‘ක්ලීන් ශ්‍රී ලංකා’ වැඩසටහනට සමගාමීව පොලිසිය විශේෂ රථ වාහන පරීක්ෂා කිරීම ආරම්භ කළා.
එම පරීක්ෂා කිරීම්වලට අනුව මගී බස් රථ පරීක්ෂාවට සිවිල් ඇඳුමින් සැරසුණු පොලිස් නිලධාරින් රාජකාරියේ යොදවා තිබෙනවා.
පෞද්ගලික බස් හිමියන්ගේ සංගම් පවසන්නේ එලෙස සිවිල් ඇඳුමින් සැරසුණු පොලිස් නිලධාරින් බස් රථ තුළ ගමන් කර බස් රථ රියදුරන් සිදුකරන වැරදි සම්බන්ධයෙන් නඩු පැවරීමට හැකියාවක් නොමැති බවයි.
