මේ ගෙවෙමින් පවතින්නේ තමාගේ ජීවිතයේ අසීරු කාලයක් බවත්, එම කාලයේදී තමාට සහය දෙන ලෙසත් ඉන්දීය බොලිවුඩ් සිනමාවේ ජනප්‍රිය නිළියක් වන ජැකලීන් ෆර්ඩිනැන්ඩස් ලොව පුරා මාධ්‍යයෙන් ඉල්ලා තිබේ. ඇය මේ ඉල්ලීම කර ඇත්තේ ඇයගේ සහ සුකේෂ් චන්ද්‍ර‍ෙස්කර් නම් පුද්ගලයාගේ ඡායාරූප මාධ්‍යවල පළ වීමත් සමඟිනි.
සුකේෂ් චන්ද්‍රසේකර් නම් වන පුද්ගලයා දැන් මාස කිහිපයක සිට ඉන්දියාවේ පමණක් නොව ලොව පුරා ප්‍රසිද්ධියට පත්ව සිටින්නේ නොයෙකුත් නීති විරෝධී ක්‍රියා සිදුකිරීම සම්බන්ධයෙනි. කළු සල්ලි ජාවාරම් හා ඔහුගේ නම ඍජුවම සම්බන්ධ වී පවතින අතර ඔහු සමඟ සබඳතා පැවැත්වූ ජනප්‍රිය චරිත කිහිපයක්ද පසුගිය දිනවල හෙළිදරවු විය.
වරක් ඔහු කන්නඩ සිනමා නිළියක් සමග කොළඹ නගරයේ ආයෝජන සඳහා මුදල් ආයෝජනය කළ බව ප්‍රකාශ වූයේ එම නිළිය ඔහුට විරුද්ධව ඉන්දීය උසාවියකට පැමිණිලි කළ බැවිනි. මේ අන්දමින් සුකේෂ් චන්ද්‍ර‍ෙස්කර් නම් පුද්ගලයා ඉන්දීය සිනමාවේ ජනප්‍රිය පුද්ගලයන් සමඟ මිත්‍ර සබඳතා පවත්වමින් තම ජාවාරම් නිදහසේ සිදුකරගත් බව ඉන්දීය පොලීසිය සැක පහළ කර තිබේ.
මේ අතරට ජැකලීන් ෆර්ඩිනැන්ඩස් ගෑවෙන්නේ ඇයද සුකේෂ් චන්ද්‍ර‍ෙස්කර් සමඟ අයථා මුදල් ගනුදෙනුවල නිතර වූ බවට සැක පහළ කරමින් ඉන්දීය පොලීසිය ඇයගෙන්ද ප්‍රශ්න කිරීමෙන් පසුවය.
මේ අතර ඇය සහ සුකේෂ් චන්ද්‍ර‍ෙස්කර් සිටින ඡයාරූපයක් සමාජ මාධ්‍යවල වේගයෙන් සංසරණය වීම ආරම්භ වීමත් සමඟ පොලීසිය ජැකලීන්ගෙන් ප්‍රශ්න කිරීම කෙරෙහි කිසියම් සාධාරණ සැකයක් ජනතාව අතර ඇති වූ බව ද පෙනෙන්නට විය.
පසුගියදා ජැකලීන් ජනමාධ්‍යවලින් තමාට සහයෝගය ලබා දෙන ලෙස ඉල්ලා සිටින්නේ එබඳු පසුබිමක් යටතේය.
ඇය තම ඉන්ස්ටර්ග්‍රෑම් පිටුවේ පණිවිඩයක් නිකුත් කරමින් පවසා සිටියේ තමන්ට මුළු මහත් ඉන්දියාව දැඩි ආදරයක් සහ ගෞරවයක් ලබා දුන් බවයි. එම ආදරය සහ ගෞරවය තමා වෙත ලැබීමට ජනමාධ්‍ය හේතු වූ බව පවසා සිටි ජැකලීන් ඒ සඳහා සහය දුන් ජන මාධ්‍ය‍ෙව්දීන්ටද ස්තුති කර තිබේ. ඒ සමඟින්ම ඇය එම මාධ්‍යවේදීන්ගෙන් ඉල්ලා ඇත්තේ තමා වෙත ආදරය සහ ගෞරවය ලබා දුන්නද තමාගේ පෞද්ගලික ජිවිතයට අනවශ්‍ය ලෙස එබී බැලීම නොකරන ලෙසයි.
“ ඔබ එවැනි දෙයක් කෙදිනකවත් ඔහුගේ පවුලේ සාමාජිකයන්ට කරන එකක් නැහැ. ඒ නිසාම මටත් එවැනි දෙයක් කරන්න එපා.‘ ඇය තම ඉන්ස්ටර්ග්‍රෑම් පණිවිඩය අවසන් කර ඇත්තේ ජනමාධ්‍යවේදීන්ගෙන් එසේ ඉල්ලමිනි. එසේම ඇය වැඩිදුරටත් සඳහන් කර ඇත්තේ තමා මේ ගෙවමින් ඉන්නේ අසීරු කාලයක් බවත්, එම කාලය ගෙවා ගැනීමට සැමගේ සහය අවශ්‍ය වන බවත්ය. ඇය එසේ ඉල්ලා සිටියද නීති විරෝධී වැඩ කළ සුකේෂ් චන්ද්‍ර‍ෙස්කර් සමඟ ඇයගේ නමත් නීති විරෝධී කටයුතු සම්බන්ධව ගෑවි පවතින්නේ නම් ඉන්දීය පොලීසිය නිකම් නොසිටිනු ඇත.
