මෙවර තම විදුලි බිල්පත ඉහළ ගොස් තිබීම හේතුවෙන් ඒ සම්බන්ධයෙන් විමසීමට කළුතරට පැමිණි විශ්‍රාමික විදුහල්පතිවරයෙකු කළුතර බෝධි පරිශ්‍රයේ පහත මළුව තුළදී හදිසියේ මියගොස් තිබෙනවා.
මෙලෙස මියගොස් ඇත්තේ කළුතර උතුර පදිංචි 72 හැවිරිදි එක් දරු පියෙක්.
විශ්‍රාමික විදුහල්පතිවරයා පහත මළුව තුළ දී හදිසියේ ඇද වැටීමත් සමගම පොලිස් මුරපොළේ නිලධාරීන් සුවසැරිය ගිලන් රථය එම ස්ථානයට ගෙන්වීමට කටයුතු කළ ද එහි සෞඛ්‍ය සේවකයන් ඔහු පරීක්ෂාකර බලා ප්‍රකාශ කර ඇත්තේ මියගොස් ඇති බවයි.
අනතුරුව මෙලෙස මිය ගියේ කවුරුන්දැයි සනාථ කර ගැනීම සඳහා මියගිය පුද්ගලයා සතුව තිබූ ලේඛන පරීක්ෂා කිරීමේදී එහි තිබූ විදුලි බිල්පතේ තිබූ දුරකථන අංකයට අමතා මේ බව දැනුම් දීමට පොලිස් නිලධාරීන් පියවර ගෙන තිබෙනවා.
මියගිය විශ්‍රාමික විදුහල්පතිවරයා නිවසින් පිටත් වී කළුතරට පැමිණ ඇත්තේ මෙවර නිවසේ විදුලි බිල්පත ඉහළ යාම සම්බන්ධයෙන් විදුලි පාරිභෝගික මධ්‍යස්ථානයෙන් විමසන බව පවසමින්.
ඔහු බුදුන් වැදීම සදහා නිතර කළුතර බෝධි පරිශ්‍රයට පැමිණෙන පුද්ගලයකු බව සඳහන්.
මහේස්ත්‍රාත් පරීක්ෂණය සිදු කර ඇති අතර මෙම මරණය සම්බන්ධයෙන් අපරාධ ස්ථාන පරීක්ෂණාගාර නිලධාරීන් ද පරීක්ෂණ සිදු කර තිබෙනවා.
පරීක්ෂණවලින් පසු මෘතදේහය කළුතර ශික්ෂණ රෝහලට යොමු කිරීමට නියමිතයි.
