පාර්ලිමේන්තු මන්ත්‍රී මහාචාර්ය රංජිත් බණ්ඩාරගේ සභාපතීත්වයෙන් රැස්වූ පොදු ව්‍යාපාර පිළිබද කාරක සභාවට (කෝප් කමිටුව) ජාතික ඖෂධ නියාමන අධිකාරිය කැඳවා තිබුණා.
මෙහිදී 2019 සහ 2020 වර්ෂ සඳහා වන විගණකාධිපති වාර්තා හා වර්තමාන කාර්ය සාධනය පිළිබඳ පරීක්ෂා කිරීමටයි නියමිතව තිබුණේ.
එහෙත් ජාතික ඖෂධ නියාමන අධිකාරියේ අධ්‍යක්ෂ මණ්ඩලය විසින් පසුගිය අගෝස්තු 18 වනදා ගත් තීරණයක් මත විගණකාධිපතිවරයාගේ කාර්ය මණ්ඩලය විසින් අධිකාරියෙන් තොරතුරු ඉල්ලා සිටීමේදී ලිඛිත ඉල්ලීම් සිදු කළ යුතු බවට තීරණය කර ඇති බවත් මෙය ආණ්ඩුක්‍රම ව්‍යවස්ථාවෙන් විගණකාධිපතිවරයාට පැවරී ඇති බලතල උල්ලංඝනය කිරීමක් බවත් කෝප් කමිටුව පෙන්වා දී තිබෙනවා.
මේ හේතුවෙන් මෙය පාර්ලිමේන්තුවට පැවරී ඇති බලතල උල්ලංඝනය කිරීමක් බවයි කෝප් කමිටුවේ අදහස වූයේ. එසේම මෙම අධ්‍යක්ෂ මණ්ඩල තීරණය සම්බන්ධයෙන් සෞඛ්‍ය අමාත්‍යාංශයේ ලේකම්වරයා නොදැනුවත් බව ද මෙහිදී අනාවරණය වුණා.
විශේෂයෙන්ම මෙම තීරණය මගින් විගණකාධිපතිවරයාගේ ස්වාධීනත්වයට බලපෑමක් සිදු වන බවත් මෙම තත්ත්වය සිදු නොවිය යුත්තක් බවත් කෝප් කමිටුවේ සභාපතිවරයා පෙන්වා දෙනු ලැබූ අතර කෝප් කමිටුව පැමිණි නිලධාරීන්ට දැඩි අවවාද ලබාදීම ද සිදු කෙරුණා.
මෙහිදී කෝප් කමිටුව විසින් ප්‍රධාන තීන්දු තුනක් ජාතික ඖෂධ නියාමන අධිකාරියට ලබාදී තිබෙනවා.
එනම්
- විගණකාධිපතිවරයාගේ බලතලවලට අනුගත වී කටයුතු කරන ලෙස සදහන් කරමින් සෞඛ්‍ය අමාත්‍යාංශය යටතේ ඇති සියලු ආයතන ප්‍රධානීන්ට අමාත්‍යාංශයේ ලේකම්වරයා විසින් චක්‍රලේඛයක් නිකුත් කිරීම
- ජාතික ඖෂධ නියාමන අධිකාරියේ අධ්‍යක්ෂ මණ්ඩලය ගත් තීරණය අත්හිටුවීම
- විගණකාධිපතිවරයා විසින් නිර්දේශ කරනු ලබන දිනයක නැවත ජාතික ඖෂධ නියාමන අධිකාරිය කෝප් කමිටුවට කැඳවීම එම තීරණයන් වුණා.
