සංචාරක ඕස්ට්‍රේලියානු ක්‍රිකට් කණ්ඩායමේ ශ්‍රී ලංකා තරග සංචාරය එළඹෙන 07 වනදා ආරම්භ වීමට නියමිතව තිබෙනවා.
මෙම තරග සංචාරයට විස්සයි විස්ස තරග තුනක්, එක්දින තරග පහක් සහ ටෙස්ට් තරග දෙකක් ඇතුළත්.
කෙසේ වෙතත් ශ්‍රී ලංකාව මේ වනවිට මුහුණ දී සිටින ඉන්ධන අර්බුදය හේතුවෙන් මෙම තරග මාලාවේ සීමිත පන්දුවාර තරග (එක්දින – විස්සයි විස්ස) සියල්ල දිවා තරග ලෙස පැවැත්වීමට ශ්‍රී ලංකා ක්‍රිකට් ආයතනය ඕස්ට්‍රේලියානු ක්‍රිකට් ආයතනය වෙත යෝජනාකර ඇති බවයි වාර්තා වුණේ.
එම යෝජනාව සම්බන්ධයෙන් ඕස්ට්‍රේලියානු ක්‍රිකට් ආයතනය යහපත් ප්‍රතිචාරයක් දක්වා නොමැති බවයි ක්‍රිකට් ආරංචි මාර්ග සඳහන් කළේ.
ශ්‍රී ලංකා ක්‍රිකට් ආයතනයේ එම යෝජනාව ඕස්ට්‍රේලියානු ක්‍රිකට් ආයතනය ප්‍රතික්ෂේප කිරීමත් සමඟ සැලසුම්කර පරිදි එම තරග පැවැත්වීට සිදුවනවා.
ඒ අනුව පෙර සැලසුම් කළ පරිදි විස්සයි විස්ස තරග පස්වරු 7.00ටත්, එක් දින තරග 05 පස්වරු 2.00ටත් ආරම්භ කිරීමට සිදුවන බවයි වාර්තා වන්නේ.
විස්සයි විස්ස සහ එක්දින තරගාවලි කොළඹ ආර්. ප්‍රේමදාස ක්‍රීඩාංගනයේ සහ පල්ලෙකැලේ ජාත්‍යන්තර ක්‍රිකට් ක්‍රීඩාංගණයේ දී පැවැත්වීමටයි සැලසුම්කර ඇත්තේ.
එම ක්‍රීඩාංගණ දෙකේ අදාල තරග පැවැත්වීමේ දී අවශ්‍ය විදුලි ආලෝකය ලබාදීම සඳහා ඩීසල් මඟින් ක්‍රියාත්මක වන විශාල ප්‍රමාණයේ විදුලි ජනක යන්ත්‍ර භාවිත කිරීම සිදුකරනු ලබනවා.
