රුපියල් එක් කෝටි විසිපන් ලක්ෂයක් පමණ වටිනා ‘කුෂ්’ මත්ද්රව්ය තොගයක්, ටොෆී සහ චොකලට් පැකට් ලෙස සකස් කර, සිය ගමන් මළු තුළ සූක්ෂ්ම ලෙස සඟවාගෙන ආ විදේශිකයෙකු අත් අඩංගුවට ගෙන තිබෙනවා.
මෙම සැකකරු ඊයේ (04) අදාළ මත්ද්රව්ය තොගය කටුනායක ගුවන් තොටුපොළෙන් පිටකර ගෙන යාමට තැත් කිරීමේදියි පොලිස් මත්ද්රව්ය කාර්යාංශයේ නිලධාරීන් පිරිසක් විසින් අත්අඩංගුවට ගනු ලැබුවේ.
සැකකාර ගුවන් මගියා ඊයේ පස්වරුවේ 05.10ට ඉන්දියාවේ – නවදිල්ලි නුවර සිට ඉන්දීය ගුවන් සේවයේ ඒ.අයි.- 281 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
මොහු 45 හැවිරිදි ඉන්දීය ජාතිකයෙකු බවත් ඔහු ඉන්දියාවේ චෙන්නායි නුවර ජංගම දුරකථන අලෙවිසැළක් පවත්වාගෙන යන ව්යාපාරිකයෙකු බවත් වාර්තා වනවා.
ඔහු රැගෙන ආ ගමන් මළු තුළ වූ ටොෆී සහ චොකලට් අඩංගු පැකට් තුළ මෙම ‘කුෂ්’ මත්ද්රව්ය කිලෝග්රෑම් 01යි ග්රෑම් 40 ක ප්රමාණය සඟවාගෙන තිබියදීයි සොයා ගැනුණේ.
මොහුගේ සහෝදරයෙකු කොළඹ ප්රදේශයේ පදිංචි වී සිටින අතර, මීට පෙර අවස්ථා කිහිපයකදී ම එම සහෝදරයා මුණ ගැසීමේ මුවාවෙන්, මෙරටට පැමිණ ඇති බව පොලිස් මත්ද්රව්ය කාර්යාංශයේ නිලධාරීන් විසින් සිදු කළ මූලික විමර්ශනවල දී අනාවරණය කර ගැනීමට හැකි ව තිබෙනවා.
මෙසේ අත්අඩංගුවට ගත් මත්ද්රව්ය තොගය සමග මෙම ඉන්දීය ජාතික ගුවන් මගියා අද (05) දින මීගමුව මහේස්ත්රාත් අධිකරණය වෙත ඉදිරිපත් කිරීමට නියමිතයි.
ඉන්පසුව රඳවා තබාගෙන ප්රශ්න කිරීමට අවසර ලබාගෙන කොළඹ පොලිස් මත්ද්රව්ය කාර්යාංශයේ මූලස්ථානය වෙත මේ පිළිබඳ වැඩිදුර විමර්ශන සඳහා භාරකිරීමට නියමිතව තිබෙනවා.
