යාපනය දිස්ත්‍රික්කයේ හඳුනා නොගත් උණ රෝගයක් පැතිරෙන බවට තොරතුරු වාර්තා වනවා.
දසත ප්‍රාදේශීය වාර්තාකරු පැවසුවේ; එම උණ රෝගයෙන් මේ වනවිට (10) පුද්ගලයින් තිදෙනකු මියගොස් ඇති බවයි.
උණ රෝගය වැළඳීම හේතුවෙන් මෙම පුද්ගලයින් තිදෙනා ම දින කිහිපයක දී රෝහල්ගත කර ඇති අතර ඔවුන් රෝගය වැළඳී දෙදිනක් තුළ මියගොස් ඇතැයි යාපනය ශික්ෂණ රෝහල පවසා තිබෙනවා.
මෙම මරණ සම්බන්ධයෙන් අද (10) සිට පරීක්ෂණයක් ආරම්භ කිරීමට කටයුතු යොදා ඇති බවයි යාපනය රෝහල් අධ්‍යක්ෂ ටී. සත්‍යමූර්ති මහතා පවසා සිටියේ.
මියගිය පුද්ගලයින්ගේ ශරීර කොටස් වැඩිදුර පරීක්ෂණ සඳහා කොළඹ ජාතික රෝහල වෙත යොමු කර තිබෙනවා.
මෙලෙස රෝගීන්ට වැළඳුණු වෛරසය කුමක් දැයි හෙළි නොවීම හේතුවෙන් උතුරේ වෛද්‍යවරු දැඩි ගැටලුවකට මුහුණ පා ඇති බවත් දසත ප්‍රාදේශීය වාර්තාකරු පැවසුවා.
යාපනය – පේදුරුතුඩුව ප්‍රදේශයේ පදිංචි ව සිටි අවුරුදු 42 ක පුද්ගලයෙකු හා නාවට්කුලි ප්‍රදේශයේ ජීවත් වූ අවුරුදු 32ක පුද්ගලයෙකු මෙන් ම කිළිනොච්චිය රෝහලෙන් යාපනය ශික්ෂණ රෝහල වෙත මාරු කළ 28 හැවිරිදි තරුණයෙකු ද මියගිය අය අතර සිටිනවා.
යාපනය ශික්ෂණ රෝහලේ අධ්‍යක්ෂවරයා වැඩිදුරටත් සඳහන් කළේ; උණ හා කැස්ස මෙහි ප්‍රධාන රෝග ලක්ෂණ බවත්; දැනටමත් මෙම රෝග ලක්ෂණ පෙන්නුම කරන්නේ ද වහාම ළඟම පිහිටි රජයේ රෝහලකට ගොස් රුධිර සාම්පල පරීක්ෂාවක් සිදු කරගන්නා ලෙසයි.
