ඊශ්රායලය සහ හමාස් සංවිධානය අතර පවතින යුද්ධය හේතුවෙන් හය හැවිරිදි පිරිමි දරුවෙක්ව පුද්ගලයෙකු විසින් අමානුෂිකව ඝාතනය කළ පුවතක් ඇමරිකාවේ චිකාගෝවෙන් වාර්තා වනවා.
පලස්තීන-ඇමරිකානු පිරිමි දරුවකු වන වඩේ අල්- ෆායුම් සහ ඔහුගේ මව හනාන් ෂාහින්ට මෙලෙස පිහියකින් ඇන ඇති බවයි විදෙස් මාධ්ය වාර්තා කරන්නේ.
71 හැවිරිදි ජෝසෆ් ක්සුබා නැමැති පුද්ගලයෙක් මෙම අපරාධය සිදුකර ඇති අතර, ඔහුව එරට ආරක්ෂක අංශ මඟින් අත්අඩංගුවට ගැනීමට කටයුතු කර තිබෙනවා.
චිකාගෝහි විල් කවුන්ටි ෂෙරිෆ් කාර්යාලය ප්රකාශයක් නිකුත් කරමින් සඳහන් කරන්නේ පසුගිය සෙනසුරාදා උදෑසන මෙම මව සහ පුත්රයා පිහි ප්රහාරයට ලක්ව චිකාගෝ සිට නිරිත දෙසින් සැතපුම් 40 ක් පමණ දුරින් පිහිටි නිවසක සිටියදී සොයා ගත් බවයි.
අනතුරුව ඔවුන් වහාම රෝහල් ගත කිරීමට කටයුතු කර ඇති අතර, පසුව දරුවා මිය ගිය බවයි ඔවුන් වැඩිදුරටත් සඳහන් කර සිටියේ.
සැකකාර මහල්ලා විසින් දරුවාගේ ශරීරයට 26 වතාවක් පිහියෙන් ඇන ඇති බවට සිදුකළ වෛද්ය පරීක්ෂණවල දී අනාවරණය වී තිබෙනවා.
මවගේ සිරුරේ ද පිහි ඇනුම් තුවාල දුසිමකට වඩා තිබී ඇති අතර, ඇය ද රෝහල් ගතව ප්රතිකාර ලබන අතර දිවි ගලවාගනු ඇතැයි අපේක්ෂා කරනවා.
මෙම ප්රහාරය සඳහා භාවිත කරන ලද පිහිය අඟල් 12ක මිලිටරි මාදිලියේ පිහියක් වන බවයි ෂෙරිෆ්ගේ කාර්යාලය පැවසුවේ.
මෙම ම්ලේච්ඡ ප්රහාරයට ගොදුරු වූවන් දෙදෙනාම මුස්ලිම් ජාතිකයන් වීම සහ හමාස් සහ ඊශ්රායලයන් සම්බන්ධ ගැටුම හේතුවෙන් සැකකරු විසින් ඉලක්ක කර ඇති බවට අනාවරණය කර ගැනීමට රහස් පරීක්ෂකයින්ට හැකිව තිබෙනවා.
