අඛණ්ඩව තුන්වන වරටත් ඉන්දියාවේ අග්‍රාමාත්‍ය ධූරයේ දිවුරුම් දුන් නරේන්ද්‍ර මෝදිට ජනාධිපති රනිල් වික්‍රමසිංහ සිය උණුසුම් සුබ පැතුම් පිරිනැමුවා.
එමෙන්ම ඉන්දු – ශ්‍රි ලංකා සබඳතා සවිමත්ව ඉදිරියට ගෙන යාමට යළිත් නායකයෝ ප්‍රතිඥා දුන්නා.
නරේන්ද්‍ර මෝදිගේ දිවුරුම් දීමේ උත්සවය ඊයේ (09) පස්වරුවේ නවදිල්ලි නුවර රාෂ්ට්‍රපති භවන්හි දී උත්කර්ෂවත් අන්දමින් පැවැත්වුණු අතර, නරේන්ද්‍ර මෝදිගේ විශේෂ ඇරයුම පරිදි ජනාධිපති රනිල් වික්‍රමසිංහ ද එම අවස්ථාවට එක් වුණා.
අග්‍රාමාත්‍ය නරේන්ද්‍ර මෝදිගේ දිවුරුම්දීමේ උත්සවයෙන් පසුව ජනපති රනිල් වික්‍රමසිංහ සහ ඉන්දීය අග්‍රාමාත්‍ය නරේන්ද්‍ර මෝදි අතර පැවති විශේෂ හමුවේ දී මෙරට සංචාරයක් සඳහා ද එක්වන ලෙස ජනාධිපතිවරයා විසින් ආරාධනාවක් ද සිදුකර තිබෙනවා.
ඒ, අනුව ජනාධිපති රනිල් වික්‍රමසිංහ විසින් සිදුකළ ආරාධනය ඉන්දීය අග්‍රාමාත්‍යවරයා විසින් පිළිගෙන ඇති බවයි වාර්තා වන්නේ.
එමෙන්ම ඉන්දීය අග්‍රාමාත්‍යවරයා එළඹෙන අගෝස්තු මාසයේ දී ශ්‍රී ලංකා සංචාරය සිදුකරනු ඇති බවයි තොරතුරු වාර්තා වුණේ.
මේ අතර අග්‍රාමාත්‍ය නරේන්ද්‍ර මෝදි විසින් සංවිධානය කර තිබූ රාත්‍රී භෝජන සංග්‍රහයට ද ජනාධිපති රනිල් වික්‍රමසිංහ ඇතුළු රාජ්‍ය නායකයන් ඊයේ (10) එක් වුණා.
අග්‍රාමාත්‍ය නරේන්ද්‍ර මෝදිගේ දිවුරුම් දීමේ උත්සවයට ජනාධිපති රනිල් වික්‍රමසිංහගේ පැමිණීම පිළිබඳ ඉන්දීය මාධ්‍ය මගින් සුවිශේෂී ප්‍රචාරයක් ලබා දී තිබූ අතර, නවදිල්ලි අගනුවර ප්‍රධාන වට රවුම් ආශ්‍රිතව ශ්‍රී ලංකා ජනාධිපතිවරයාගේ සහ මෝදි අගමැතිවරයාගේ රුව සහිත පුවරු ප්‍රදර්ශනය කර තිබුණා.
