ශ්‍රී ලංකාවේ ඉන්දීය මහ කොමසාරිස් සන්තෝෂ් ජා ඊයේ (07) ආරක්ෂක අමාත්‍යාංශයේ දී ආරක්ෂක ලේකම් විශ්‍රාමික එයාර් වයිස් මාර්ෂල් සම්පත් තුයියකොන්තා හමුවුණා.
ඉන්දීය මහ කොමසාරිස්වරයා සමඟ ශ්‍රී ලංකාවේ ඉන්දීය මහ කොමසාරිස් කාර්යාලයේ ආරක්ෂක උපදේශක කැප්ටන් ආනන්ද් මුකුන්දන් සහ සහකාර ආරක්ෂක උපදේශක ලුතිනන් කර්නල් මන්දීප් සිං නේගි ද මෙම අවස්ථාවට එක්ව සිටියා.
ආරක්ෂක අමාත්‍යාංශය වෙත පැමිණි ඉන්දීය දූත පිරිස ආරක්ෂක ලේකම්වරයා විසින් ඉතා උණුසුම් අයුරින් පිළිගැනීමෙන් අනතුරුව ඔවුන් සමඟ සුහද කතාබහක ද නිරත වුණා.
පෞරාණික ඉතිහාසයකට උරුමකම් ඇති ඉන්දු – ශ්‍රී ලංකා ද්විපාර්ශ්වික සබඳතා තවදුරටත් අවධාරණය කරමින්, දෙරට අතර පවතින දීර්ඝ කාලීන ආරක්ෂක සහයෝගීතාව තවදුරටත් ශක්තිමත් කිරීම පිළිබඳව දෙපාර්ශවයේ නියෝජිතයින් පැවති සාකච්ඡාවලදී ප්‍රධාන වශයෙන් අවධානය යොමුව තිබෙනවා.
එමෙන්ම කලාපීය ආරක්‍ෂාව සහ සමුද්‍රීය සහයෝගීතාව ඔස්සේ ආරක්ෂක සහයෝගීතාව ඉහළ නැංවීම සඳහා ගත හැකි පියවර පිළිබඳව ද මෙහිදී ඔවුන් අදහස් හුවමාරු කර ගත්තා.
ශ්‍රී ලංකාවේ ජාතික ආරක්‍ෂාව තහවුරු කිරීමේ දී විශේෂයෙන්ම ත්‍රස්තවාදයට එරෙහි ක්‍රියාකාරකම්, සමුද්‍රීය ආරක්ෂක අභියෝග මෙන්ම හදිසි ආපදා තත්ත්වයන්හි දී අවශ්‍ය ප්‍රතිචාර දැක්වීමට ඉන්දියාවේ නොසැලෙන සහයෝගය ලබාදෙන බවට ඉන්දීය මහ කොමසාරිස්වරයා අවධාරණය කළා.
ආරක්ෂක ලේකම්වරයා ඉන්දියාව විසින් මේ දක්වා ලබාදුන් අඛණ්ඩ සහාය වෙනුවෙන් සිය කෘතඥතාව පළ කළ අතර, කලාපයේ ස්ථාවරත්වය සහ ආරක්‍ෂාව සහතික කිරීම සඳහා ඉන්දු – ශ්‍රී ලංකා ආරක්ෂක හවුල්කාරිත්වයේ වැදගත් කාර්යභාරය ද තහවුරු කර සිටියා.
