ශ්‍රී ලාංකේය ඉතිහාසයේ පළමු වරට රග්බි ලෝක කුසලානයක් මෙරටට ගෙන ඒමේ අවස්ථාව උදා කරමින් 2023 ප්‍රංශයේ පැවැත්වීමට නියමිත ලෝක කුසලාන රග්බි තරගාවලියේ ජයග්‍රාකයින්ට පිරිනැමීමට නියමිත කුසලානය අද (18) අලුයම මෙරටට රැගෙන ආවා.
මෙම කුසලානය මෙම පෙබරවාරි මස 18 දින සිට 23 දක්වා දින 06ක් මෙරට තුළ දී ප්‍රදර්ශනය කිරීමට නියමිතයි.
අද (18) අලුයම 05.25ට ප්‍රංශයේ පැරිස් නුවර සිට පැමිණි ශ්‍රී ලන්කන් ගුවන් සේවයේ යූ.එල්.- 564 දරණ ගුවන් යානයෙන් කටුනායක ගුවන් තොටුපළ වෙත මෙම කුසලානය රැගෙන ආවා.
එම කුසලානය පිළිගැනීම සදහා ජාතික ක්‍රීඩා සභාවේ ලේකම් සුජානි බෝගොල්ලාගම, හිටපු මහ බැංකු අධිපති , ශ්‍රී ලංකා පළමු රග්බි ක්‍රීඩා නායක (1974) ආචාර්ය ඉන්ද්‍රජිත් කුමාරස්වාමි, හිටපු රග්බි සභාපති , ජාතික ක්‍රීඩා සභාවේ මන්ත්‍රණ සභා සාමාජික වෛද්‍ය මයියා ගුණසේකර, හිටපු රග්බි සභාපති සහ ශ්‍රී ලංකා රග්බි ක්‍රීඩක ලසිත ගුණරත්න යන පිරිස කටුනායක ගුවන් තොටුපොළ වෙත පැමිණ සිටියා.
