රටේ පවතින ඩොලර් හිඟය සහ පනවා තිබූ ආනයන සීමා හේතුවෙන් පෙබරවාරි 14 වැනිදාට යෙදී ඇති ආදරවන්තයන්ගේ දිනය ඉලක්ක කරගෙන අලෙවි කරන සැරසිලිවල මිල ගණන් පෙරට සාපේක්ෂව සියයට සියයකින් ඉහළ ගොස් ඇති බව ව්‍යාපාරිකයෝ පෙන්වා දෙති. ඔවුන් පවසන්නේ මෙම සැරසිලි බොහෝමයක් චීනයෙන් ආනයනය කරන නමුත් පැවැති වසංගත තත්ත්වය හේතුවෙන් මෙවර මෙම තොග කිසිවක් ආනයනය නොකළ බවය.
වසංගත තත්ත්වය හේතුවෙන් පසුගිය සමයේ ආදරවන්තයන්ගේ දිනය වෙනුවෙන් උත්සව අවස්ථා පැවැත්වීම තහනම් කර තිබුණ ද මෙම වසරේ දී එවැනි තහනමක් නැති බැවින් මේ වන විට ආදරවන්තයන්ගේ දිනය වෙනුවෙන් යොදා ගන්නා සැරසිලි සඳහා වැඩි ඉල්ලුමක් පවතින බව ව්‍යාපාරිකයෝ කියති. මේ වන විටත් විවිධ සැරසිලි සහ තෑගි භාණ්ඩ සඳහා ඇණවුම් විශාල වශයෙන් ලැබෙමින් පවතියි.
තවද මෙම කාලසීමාවේ දී අධික ඉල්ලුමක් පවතින රතු රෝස මලක මිල රසායනික පොහොර ගැටලුව හේතුවෙන් රුපියල් 200ත් 300ත් අතර මිලකට ඉහළ ගොස් තිබේ. රතු රෝස මලක පෙර මිල පැවති ඇත්තේ රුපියල් 80ත් 100ත් අතරය.
වගාකරුවන් පවසන්නේ මේ දිනවල දී රතු රෝස සඳහා අධික ඉල්ලුමක් පවතින නමුත් පොහොර නොමැති හෙයින් පෙර පරිදි රෝස මල් අස්වැන්නක් ලබාගැනීමට නොහැකි වූ බැවින් ඉල්ලුමට සරිලන සැපයුමක් ලබාදීමට නොහැකිව ඇති බවයි.
ඒ හේතුවෙන් මේ වන විටත් ස්වාභාවික රතු රෝස මල් වැඩි ගණනක් චීනයෙන් සහ ඉන්දියාවෙන් ආනයනය කර තිබේ. මින් පෙර ආදරවන්තයන්ගේ දිනවල දී මිලියන ගණනින් අලෙවි වන රතු රෝසවලට සාපේක්ෂව මෙම වසරේ දී කෘත්‍රිම රතු රෝස සඳහා පවතින ඉල්ලුම වැඩි වී තිබේ.
