ආත්මාරක්ෂාව සඳහා ගිනි අවි නිකුත් කිරීම සීමා කර තිබෙනවා.
ඒ අනුව අද (04) දිනයේ දී ආරක්ෂක අමාත්‍යාංශය දැනුම්දී ඇත්තේ ගිනිඅවි නිකුත් කිරීම තුළ දී එක් ගිනි අවියක් පමණක් එක් අයෙකුට ලබාදීමටයි.
මේ අතර පාර්ලිමේන්තු හා පළාත් සභා මන්ත්‍රීවරුන්ට, විවිධ දේශපාලන පක්‍ෂ නායකයින්ට, දේශපාලන සංවිධානවලට මෙන්ම විවිධ තනතුරු දැරූ රජයේ විධායක නිලධාරීන්ට ජීවිත ආරක්‍ෂාව සඳහා නිකුත් කර ඇති ගිනිඅවි මෙම මස 30ට පෙර ළඟම පොලිසියට භාර දෙන ලෙස ආරක්ෂක අමාත්‍යාංශය පසුගියදා නිවේදනය කළා.
ආරක්ෂක අමාත්‍යාංශය පවසන්නේ ගිනිඅවි ලබා දුන් පුද්ගලයින්ගේ නාමලේඛනයක් පොලීසිය සතු බවයි.
එම නාමලේඛනයේ නම් සඳහන් පුද්ගලයින්ගේ තොරතුරු විමසා ගිනිඅවි පොලීසිය භාරයට ගැනීමට සියලුම පොලිස් ස්ථානාධිපතිවරුන්ට උපදෙස් දුන් බව ද, ආරක්ෂක අමාත්‍යාංශය නිකුත් කළ නිවේදනයේ වැඩිදුරටත් දැක්වුණා.
එබැවින්, නීතිය හා සාමය ආරක්‍ෂා කිරීම සඳහා ශ්‍රී ලංකා පොලීසිය විසින් කරනු ලබන විමසිම් සඳහා සහයෝගය ලබාදීමට කටයුතු කරන ලෙසත්, දැනටමත් එම ලේඛනයේ නම් සඳහන් පුද්ගලයින් ගිනිඅවි රජයට භාර දී ඇත්නම් ඒ පිළිබඳව සනාථ කරන ලේඛන පොලිස් නිලධාරීන්ට ලබාදීමෙන් සහයෝගය ලබාදෙන ලෙසත් ආරක්ෂක අමාත්‍යංශය වැඩිදුරටත් දැනුම්දෙනවා.
