සීදූව පොලිස් වසමේ රාජපක්ෂපුර ප්රදේශය වටලා අද (26) අලුයම් කාලයේ විශේෂ සෝදිසි මෙහෙයුමක් ක්රියාත්මක කර තිබුණා.
පොලිසිය, පොලිස් විශේෂ කාර්ය බළකා නිලධාරීන් සහ ත්රිවිධ හමුදාවේ නිලධාරීන් 170ක් පමණ මෙම මෙහෙයුම සඳහා එක්ව සිටියා.
මෙහිදී එම ප්රදේශයේ නිවාස සහ බෝඩිං කාමර පරීක්ෂා කෙරුණා.
එම අවස්ථාවේ දී බෝඩිං කාමරයක සිටි එක් කාන්තාවක් බෝනික්කෙක් ද රැගෙන කාමරයෙන් පිටතට යෑමේ දී පොලිස් නිලධාරීන්ට ඇය පිළිබඳව සැකයක් මතුව තිබෙනවා.
එම සැකය මත කාන්තාව සන්තකයේ තිබී බෝනික්කා පරීක්ෂා කිරීමේ දී එම බෝනික්කා තුළ සඟවා තිබිය දී අයිස් මත්ද්රව්ය සහ කේරළ ගංජා සොයාගැනීමට හැකි වූ බවයි පොලිසිය සඳහන් කළේ.
ඊට අමතරව මත්ද්රව්ය කිරීමට ගන්නා විද්යුත් තරාදියක් ඒ තුළ සඟවා තිබිය දී පොලිසියට සොයාගැනීමට හැකිව තිබෙනවා.
එහිදී සැකකාර කාන්තාව අත්අඩංගුවට ගෙන ඇති අතර, ඇය කොළඹ, කොටහෙන ප්රදේශයේ පදිංචි වයස අවුරුදු 29ක් තැනැත්තියක් බවයි වාර්තා වන්නේ.
බෝනික්කා තුළ සඟවා තිබිය දී අයිස් මත්ද්රව්ය මිලිග්රෑම් 25 කට වැඩි ප්රමාණයක් හා කෙරළ ගංජා ග්රෑම් 21 කට වැඩි ප්රමාණයක් මෙලෙස සොයාගෙන තිබෙනවා.
මෙම විශේෂ මෙහෙයුමේ දී සැකපිට පුද්ගලයින් 19 දෙනෙක්, දූෂණ වැරදි සඳහා පුද්ගලයින් 07 දෙනෙක්, අධිකරණය මඟහැර සිටි එක් පුද්ගලයෙක් ද අත්අඩංගුවට ගැනීමට හැකිව වූ බවයි පොලිසිය වැඩිදුරටත් පැවසුවේ.
ඊට අමතරව අංක තහඩු නොමැති යතුරුපැදි තුනක් ද අත්අඩංගුවට ගෙන ඇති අතර, අත්අඩංගුවට ගැනුණු පිරිස මීගමුව අධිකරණය වෙත ඉදිරිපත් කිරීමට නියමිතයි.
මීගමුව කොට්ඨාසය භාර ජ්යෙෂ්ඨ පොලිස් අධිකාරි අශෝක ධර්මසේන මහතාගේ උපදෙස් මත මෙම විශේෂ මෙහෙයුම සිදුකෙරුණා.
