ඇමරිකාවේදී අබිරහස් ලෙසට මියගොස් සිටි ශ්‍රී ලාංකික තරුණයෙකුගේ මරණය සම්බන්ධයෙන් එරට ආරක්ෂක අංශ විශේෂ විමර්ශනයක් ආරම්භ කර තිබෙනවා.
ඇට්ලන්ටා ක්‍රොගර් ප්‍රදේශයේ කැස්කැඩ් පාරේ වෙළඳසැලක් අසල මෝටර් රථයක් තුළ මියගොස් සිටියදී මෙම තරුණයාගේ සිරුර හමුවී ඇති බවයි විදෙස් මාධ්‍ය වාර්තා කළේ.
එක්සත් ජනපද කෙනසෝ පොලිසිය මේ වන විට මෙම මරණය සම්බන්ධයෙන් විවිධ අංශ ඔස්සේ පරීක්ෂණ ආරම්භ කර තිබෙනවා.
හසිත් නවරත්න නම් මෙම ශ්‍රී ලාංකිකයා අතුරුදන් වී ඇත්තේ පසුගිය 2 වනදා යි.
ඔහු අවසන් වරට ඇට්ලන්ටා වෙත ගමන් කළේ සුදු පැහැති මෝටර් රථයකින් බව පොලිසියට ප්‍රකාශ කර තිබෙනවා.
පොලිසිය සිදු කළ විමර්ශනයේ දී මරණ පරීක්ෂණ ස්ථානයෙන් හමුවූ සාක්ෂි අනුව මියගිය පුද්ගලයා හසිත් නවරත්න බව පෙනී යන බවයි බලධාරීන් සඳහන් කර ඇත්තේ.
දේහය ශ්‍රී ලංකික තරුණයාගේ බවට පවුලේ අය සහ විමර්ශකයින් විශ්වාස කරන අතර සිරුර සොයා ගන්නා විට එය නරක් වී තිබූ බවද පොලිසිය ප්‍රකාශ කර තිබෙනවා.
ෆුල්ටන් ප්‍රාන්තයේ වෛද්‍ය පරීක්ෂක කාර්යාලයෙන් ඔහුගේ අනන්‍යතාවය සහ මරණයට හේතුව තහවුරු කරනු ඇති බවයි පොලිසිය සඳහන් කළේ.
මෙම තරුණයා අතුරුදහන් වූ බවට වාර්තා වූ විට පොලිස් දෙපාර්තමේන්තුව විසින් නිකුත් කරන ලද නිවේදන ද අවලංගු කර තිබෙනවා.
