ඊයේ (29) නාරාහේන්පිට පිහිටි අභයාරාම විහාරයේදී සිදුවූ සිදුවීම, සෞඛ්ය අමාත්යාංශය විසින් සංවිධානය කරන ලද වැඩසටහනක් හෝ අනුදැනුම ඇතිව සිදුකරන ලද වැඩසටහනක් නොවන බව සෞඛ්ය අමාත්යාංශය අවධාරණය කරනවා.
ඊයේ (29) දිනයේ පෙරවරුවේ සිට ජනතාව නාරාහේන්පිට අභයාරාම විහාරයේදී ඒකරාශි වී සිටි බව සෞඛ්ය අමාත්යාංශය වෙත දැනගන්නට ලැබුණු අතර මෙම තත්ත්වය කොවිඩ් මර්දන වැඩපිළිවෙලට ඉමහත් බාධාවක් වන බැවින් අභයාරාමාධිපති ස්වාමීන්වහන්සේගේ ඉල්ලීම පරිදි සවස 5.00 පමණ වනවිට එහි රැස් වූ සුළු පිරිසකට ඇස්ට්රාසෙනිකා කොවිෂීල්ඩ් එන්නත ලබා දීමට කටයුතු කළබවයි නිවේදනයක් නිකුත් කරමින් සෞඛ්ය අමාත්යාංශය සඳහන් කරන්නේ.
සෞඛ්ය අමාත්ය පවිත්රා වන්නිආරච්චි මහත්මිය මෙම සිද්ධිය සම්බන්ධයෙන් අදහස් දක්වමින් කියා සිටියේ “ඊයේ දිනයේදී අභයාරාමයේදී ඇති වූ සිද්ධිය ගැන අපි කණගාටුවට පත්වෙනවා.විශේෂයෙන්ම එම වැඩසටහන සෞඛ්ය අමාත්යාංශය විසින් හෝ සෞඛ්ය අමාත්යාංශයේ අනුදැනුම ඇතිව සිදුකරන ලද්දක් නෙවෙයි….”
කොවිඩ් මර්දන එන්නත ලබාගැනීම සදහා ඊයේ දිනයේදී නාරාහේන්පිට අභයාරාමය වෙත විශාල පිරිසක් රැස්ව සිටි අතර රැස්ව සිටි පිරිස අතර නොසන්සුන්කාරී තත්වයක් හටගත්තා.
මෙම සිදුවීම සම්බන්ධයෙන් මාධ්යයට අදහස් දක්වමින් නාරාහේන්පිට අභයාරාමාධිපති පූජ්ය මුරුත්තෙට්ටුවේ ආනන්ද හිමියන් සෞඛ්ය අමාත්යංශය වෙත චෝදනාවක්ද එල්ල කළා.
