අධිවේගී මාර්ගවල රාජකාරියේ නිරත සේවකයන් සිය සේවාවලින් ඉවත් වී වෘත්තිය ක්‍රියාමාර්ගයක් ආරම්භ කර තිබෙනවා.
ලෙඩ නිවාඩු වාර්තා කර ඇති මෙම සේවකයන් ප්‍රවේශ පත්‍ර නිකුත් කිරීම සහ මුදල් අය කර ගැනීමේ සේවාවලින් ඉවත් වී ඇති බවයි අධිවේගී මාර්ග සේවක සංගමය සඳහන් කළේ.
යුද හමුදාව ඇතුලු ආරක්ෂක අංශ සාමාජිකයන් යොදවා අදාළ සේවා පවත්වාගෙන යාමට මාර්ග සංවර්ධන අධිකාරිය සහ අධිවේගී මාර්ග මෙහෙයුම් කාර්යාලය පියවර ගෙන තිබෙනවා.
මාර්ග සංවර්ධන අධිකාරියට අනුයුක්තව සේවය කරන නිලධාරීන් 11000ක් පමණ මෙම වෘත්තිය ක්‍රියාමාර්ගයට එක්වන බවයි අධිවේගී මාර්ග සේවක සංගමය ප්‍රකාශ කළේ.
රැකියා සුරක්ෂිතතාව ඇතුලු ඉල්ලීම් කිහිපයක් මුල් කර ගනිමින් ඔවුන් මෙම සේවයෙන් ඉවත් වීමේ වෘත්තිය ක්‍රියාමාර්ගයට එළඹ තිබෙනවා.
මේ අනුව අධිවේගී මාර්ගවලට ඇතුළු වන රියදුරන්ට ප්‍රවේශ පත්‍ර නිකුත් කිරීම සහ පිටවන රියදුරන්ගෙන් මුදල් අයකිරීම තාවකාලිකව නතර වී ඇතැයි සඳහන්.
මේ තත්ත්වය මත අධිවේගී මාර්ග පිවිසුම්වල ආරක්ෂාව සඳහා මේ වන විට යුද හමුදාව කැඳවා ඇති අතර අධිවේගී මාර්ග සංචාරක පොලිස් කොට්ඨාශය නිලධාරීන්ද ඔවුන්ට සහය ලබා දෙමින් සිටිනවා.
