නිරිතදිග බෙංගාල බොක්ක මුහුදු ප්රදේශයේ පැවති පීඩන අවපාතය නැගෙනහිර වෙරළ දෙසින් දිවයිනට ඇතුලු වී ශ්රී ලංකාව හරහා ගමන් කරමින් පවතින බව කාලගුණ විද්යා දෙපාර්තමේන්තුව පවසනවා.
එය හෙට (26) දිනයේදී ශ්රී ලංකාවේ බටහිර මුහුදු ප්රදේශයට ගමන් කරනු ඇති බවටයි අපේක්ෂා කෙරෙන්නේ.
මෙහි බලපෑමෙන් අද රාත්රියේ දිවයිනේ බොහෝ ප්රදේශවල විටින් විට වැසි හෝ ගිගුරුම් සහිත වැසි ඇති විය හැකියි.
නැගෙනහිර ඌව මධ්යම සබරගමුව බස්නාහිර දකුණ සහ වයඹ පළාත්වලත් පොළොන්නරුව දිස්ත්රික්කයේත් ඇතැම් ස්ථානවලට මිලිමීටර් 150ට වඩා ඉතා තද වැසි ඇතිවිය හැකි අතර සෙසු පළාත්වලට මිලිමීටර් 75ට වැඩි තරමක තද වැසි ඇතිවිය හැකියි.
හෙට දිනයේ බස්නාහිර සබරගමුව මධ්යම දකුණ වයඹ සහ උතුරු පළාත්වල විටින් විට වැසි හෝ ගිගුරුම් සහිත වැසි ඇතිවන අතර ඇතැම් ස්ථානවලට මිලිමීටර් 100ට වැඩි තද වැසි ඇතිවීමේ හැකියාවක් පවතිනවා.
සෙසු ප්රදේශවල වැසි වාර කිහිපයක් ඇතිවිය හැකි අතර දිවයින හරහා විටින් විට හමන පැයට කිලෝමීටර් 40ක 50ක පමණ තද සුළං ද ඇතිවිය හැකි බවයි දෙපාර්තමේන්තුව කියාසිටියේ.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මගින් සිදුවන අනතුරු අවම කර ගැනීමට අවශ්ය පියවර ගන්නා ලෙසට ජනතාවගෙන් ඉල්ලීමක් කෙරෙනවා.
