හැටන් සිංගිමලේ ජලාශයේ ගිලී අතුරුදන් වූ රාම් මූර්ති තමිල් මාරන් නමැති 17 හැවිරිදි පාසල් සිසුවාගේ මෘත ශරීරය සොයාගෙන තිබෙනවා.
අප ප්රාදේශීය වාර්තාකරු පැවසුවේ පුරා පැය ගණනාවක දීර්ඝ මෙහෙයුමකින් අනතුරුව නාවික හමුදාව විසින් එම සිසුවාගේ මළසිරුර ගොඩට ගෙන ආ බවයි.
කොටගල කේම්බ්රිජ් විදුහලේ ඉගෙනුම ලබමින් සිටි මෙම සිසුවා ඔහුගේ මිත්රයින් සමග ඊයේ (08) දින සිංගිමලේ ජලාශය වෙත ඡායාරූප ගැනීමට පැමිණ තිබුණා.
ඡායාරූප ගැනීමෙන් අනතුරුව මියගිය සිසුවා සිය මිතුරන් සමග වැව් බැම්ම මතින් පැමිණෙමින් සිටියදී දියට බැස ඇත්තේ පා සෝදා ගැනීමටයි.
එහිදී එම සිසුවා ලිස්සා ගොස් ජලාශයට වැටී අතුරුදන් ව තිබෙනවා.
ගොඩට ගත් සිරුර දික්ඔය ග්ලැන්කන් දිස්ත්රික් මූලික රෝහලට යොමු කර ඇත්තේ පශ්චාත් මරණ පරීක්ෂණය සඳහා යි.
මෙම සිසුවා ඊයේ පස්වරුවේ නිවසින් බැහැර ව ගොස් ඇත්තේ බාහිර පන්තියකට යන බවට පවසා වන බවත් දරුවාගේ දෙමාපියන් විදෙස්ගත ව සිටින බවත් වාර්තා වනවා.
