මෙම වසරේ පෙබරවාරි මාසයේ මැද සිට ගෝලීය කොවිඩ් වෛරසයේ පැතිරීම ශීඝ්‍රයෙන් වැඩිවෙමින් තිබෙන බව ලෝක සෞඛ්‍ය සංවිධානය නිවේදනය කරනවා.
නව කොවිඩ් වෛරස ප්‍රභේදය WHO හඳුන්වා ඇත්තේ SARS-CoV-2 යනුවෙන්.
මැයි 28 වැනි දින නිවේදනයක් නිකුත් කරමින් ලෝක සෞඛ්‍ය සංවිධානය සඳහන් කළේ 2024 ජුලි මාසයේ සිට නිරීක්ෂණය කළ පරිදි මෙතෙක් කළ කොවිඩ් පරීක්ෂණවලින් සියයට 11ක් ම ධනාත්මක වූ බවට වාර්තා වී ඇති බවයි.
මෙම SARS-CoV-2 කොවිඩ් ප්‍රභේදය වැඩි වශයෙන් නැගෙනහිර මධ්‍යධරණී කලාපය, අග්නිදිග ආසියාව සහ බටහිර – පැසිෆික් කලාපයේ රටවල ශීඝ්‍රයෙන් පැතිරෙමින් තිබෙන බව ද ලෝක සෞඛ්‍ය සංවිධානය නිවේදනය කරනවා.
මැයි මැද භාගය වන විට වාර්තා වූ ගෝලීය SARS-CoV-2 රෝගීන්ගේ ප්‍රතිශතය 10.7% දක්වා ළඟා වී ඇති බවත් සඳහන්.
නමුත් මෙම වෛරසයේ පැතිරීම ගැන තවදුරටත් අධ්‍යයනයන් සිදු වන බවත්, දැඩි අධීක්ෂණයක් යටතේ එය සිදුවන බව ද ලෝක සෞඛ්‍ය සංවිධානය දැනුම්දෙනවා.
ලෝක සෞඛ්‍ය සංවිධානය පෙර දැනුම්දී ඇති ආකාරයට COVID-19 කළමනාකරණය කිරීම සඳහා අවදානම් මත පදනම් වූ, ඒකාබද්ධ ප්‍රවේශයක් භාවිතා කරන ලෙස සියලුම සාමාජික රටවලට උපදෙස් දී තිබෙනවා.
පුළුල් COVID-19 පාලන වැඩසටහන්වල කොටසක් ලෙස, විශේෂයෙන් අවදානම් කණ්ඩායම් අතර COVID-19 මගින් ඇතිවන දරුණු රෝග සහ මරණ වැළැක්වීම සඳහා එන්නත්කරණය ප්‍රධාන මැදිහත් වීමක් ලෙසයි සලකන්නේ.
මේ අතර ඊයේ (28) පැවති සෞඛ්‍ය ප්‍රවර්ධන කාර්‍යාංශයේ රැස්වීමකට එක්වෙමින් සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂ වෛද්‍ය අනිල් ජාසිංහ මහතා පැවසුවේ දිවයින පුරා පීසීආර් පරීක්ෂණ සිදු කිරීම ඉහළ නංවා ඇති බවයි.
අදාළ වෛරසය පැතිරීම පාලනයට ගත හැකි සෑම පියවරක් ම ගන්නා බව ද සෞඛ්‍ය අමාත්‍යාංශ ලේකම්වරයා පැවසුවා.
මූලාශ්‍රය-https://www.who.int/emergencies/disease-outbreak-news/item/2025-DON572
