අලුත්ගම, මොරගල්ල සංචාරක හෝටලයක නාන තටාකයේ දියනාමින් සිටි ඔස්ට්‍රේලියානු ජාතික සංචාරක කාන්තාවක් අද(4) පස්වරුවේ දියේගිලී බේරුවල රෝහලට ඇතුළත් කිරීමේදී මියගොස් ඇතැයි අලුත්ගම පොලිසිය පවසනවා.
මෙසේ මියගොස් ඇත්තේ, අලුත්ගම මොරගල්ල ප්‍රදේශයේ ප්‍රධාන සංචාරක හෝටලයක නවාතැන් ගෙන සිටි වට්සැක් ප්‍රාන්ස්කි නමැති 73 හැව්රිදි ඕස්ට්‍රේලියානු ජාතික සංචාරක කාන්තාවක් බව පොලිසිය සදහන් කරයි.
මියගොස් ඇති සංචාරක කාන්තාව සිය ස්වාමියා සමග මාර්තු 2වන දින ශ්‍රී ලංකාවට පැමිණ මෙම සිදුවීමට මුහුණ දුන් සංචාරක හෝටලයේ නැවතී දින 14ක කාලයක් විවේකීයව ගතකර නැවත මාර්තු 16 ඔවුන් දෙපළ මව් රටට යෑමට සිටියදී මෙම ජල අනතුර එම කාන්තාවට සිදුව ඇති බව පොලිසිය සඳහන් කර සිටී.
ජීවිත ආරක්ෂකයින් ඇයගෙ නිසල සිරුර ගොඩගෙන බේරුවල ප්‍රාදේශීය රෝහලට රැගෙනවිත් ඇති අතර ඒ වනවිටත් ඇය මියගොස් ඇති බව රෝහල් ප්‍රකාශකයෙක් කියා සිටියා.
මෘතදේහය පිළිබඳ මූලික මරණ පරීක්ෂණය බේරුවල හදිසි මරණ පරීක්ෂක බේරුවල රෝහලේදී සිදුකළ බවත් පශ්චාත් මරණ පරීක්ෂණය සඳහා සිරුර කළුතර නාගොඩ ශීක්ෂණ රෝහලට රැගෙන යන්නයි අලුත්ගම පොලිසියට නියෝග කර තිබෙනවා.
මෙම මරණය පිළිබඳ ඔස්ට්‍රේලියාවේ මෙරට තානාපති කාර්යාලය දැනුවත් කර ඇති අතර පශ්චාත් මරණ පරීක්ෂණය ඉදිරි දිනයකදී සිදු කිරීමටද නියමිතය.
