සංචාරක දකුණු අප්රිකාව සමඟ තරග පහකින් සමන්විත විස්සයි විස්ස තරගාවලිය ඊයේ (19) අවසන් වුණේ තරගාවලියේ ජය ඉන්දියාව හිමිකරගනිමින්.
දකුණු අප්රිකාව පරදා ඉන්දියාව මෙම තරගාවලිය ජයගත්තේ තරග තුනට එකක් ලෙසයි.
ලක්නව් ක්රිකට් ක්රීඩාංගණයට බලපෑ අයහපත් කාලගුණ තත්ත්වය හේතුවෙන් සිව්වන විස්සයි විස්ස තරගය එකදු පන්දුවක් හෝ නොයවා අතහැර දැමීමට සිදුවුණා.
ඒ අනුව පළමු, තුන්ව සහ පස්වන තරග ඉන්දියාව ජයගත් අතර, දකුණු අප්රිකාව ජයගත්තේ සිව්වන තරගය පමණයි.
දෙරට අතර පස්වන සහ අවසන් විස්සයි විස්ස තරගය ඊයේ (19) අහමදාබාද් හිදී පැවති අතර, මෙම තරගය ලකුණු 30කින් ජයගන්නට ඉන්දීය කණ්ඩායමට හැකියාව ලැබුණා.
මෙම තරගයේ දී තරගයේ වීරයා බවට පත්වන්නට ඉන්දීය තුන් ඉරියව් ක්රීඩක හර්දික් පාණ්ඩ්යාට හැකියාව ලැබුණා.
මේ අතර හර්දික් පාණ්ඩ්යා තරගයෙන් අනතුරුව කැමරා ශිල්පියෙක් අසළට ගොස් සිය කණගාටුව ප්රකාශ කරන ආකාරය දැක්වෙන වීඩියෝවක් මේ වනවිට සමාජ ජාලවල සංසරණය වනවා.
පාණ්ඩ්යා පන්දුවට පහරදෙමින් සිටි අවස්ථාව තමා මුහුණදුන් පළමු පන්දුවටම එල්ලකරන හයේ පහර, හතරේ සීමාවෙන් එපිට, සීමාවට ආසන්නයේ කැමරාකරණයේ නියැලී සිටි කැමරා ශිල්පියෙකුගේ වම් අතේ පන්දුව වදිනවා.
එහිදී පන්දුව වැදීමෙන් දී ඔහු දැඩි වේදනාවට පත්වන අතර, ඉන්දීය කණ්ඩායමේ වෛද්යවරයා පැමිණ ඔහුට ප්රතිකාර කරනු ලබනවා.
කෙසේ වෙතත් තරගයෙන් අනතුරුව කැමරා ශිල්පියා අසලට පැමිණෙන හර්දික් පාණ්ඩ්යා ඔහුගේ තත්ත්වය විමසා සිදුවූ සිදුවීමට කණගාටුව පළකර ඔහුව වැළඳගන්නා ආකාර සමාජ මාධ්යයේ සංසරණය වන වීඩියෝවේ දැක්වෙනවා.
