ආන්දෝලනයකට තුඩු දුන් යාපනය ශිවලෝගනාදන් විද්‍යා දැරියගේ ඝාතනය සම්බන්ධයෙන් මරණීය දණ්ඩනය නියමව පල්ලේකැලේ බන්ධනාගාරයේ රඳවා සිටි පූබාලසිංහම් තවකුමාර් නැමැති රැඳවියා මියගොස් තිබෙනවා.
මෙම රැඳවියා හදිසි රෝගී තත්ත්වයක් හේතුවෙන් මහනුවර ජාතික රෝහලට පසුගිය 31 වනදා රාත්‍රියේ ඇතුළත් කර ඇති අතර, ඉන් ටික වේලාවකට පසු ඔහු මියගොස් ඇති බවයි වාර්තා වුණේ.
මෙලෙස මියගිය පූබාලසිංහම් 39 වැනි වියේ පසුවන අතර ලබා දී තිබූ මරණය දණ්ඩනය සම්බන්ධයෙන් ඔහු අභියාචනයක් ඉදිරිපත් කර තිබූ බව පොලීසිය පවසන්නේ.
මරණීය දණ්ඩනය නියම වීමෙන් පසු පල්ලෙකැලේ දුම්බර බන්ධනාගාරයට යොමු කර සිටි මොහු විටින් විට රෝගාතුර වීම හේතුවෙන් බන්ධනාගාර රෝහලට සහ මහනුවර ජාතික රෝහලට ඇතුළත් කර ප්‍රතිකාර ලබා දී තිබෙනවා.
විද්‍යා දැරියගේ ඝාතනය සම්බන්ධයෙන් යාපනය මහාධිකරණයේ ත්‍රිපුද්ගල විනිසුරු මඩුල්ලක් විසින් ස්විස් කුමාර් ඇතුළු හත්දෙනෙකුට මරණ දඬුවම් නියම කරනු ලැබුවා.
විද්‍යා දැරිය 2015 මැයි මස 13 දින යාපනයේ දී ඝාතනයට ලක් වූ අතර, ඒ සම්බන්ධයෙන් අත්අඩංගුවට පත් පුද්ගලයින් හත්දෙනෙකුට 2017 වසරේ දී මරණ දණ්ඩනය නියම කෙරුණා.
.
