රක්ෂිත බන්ධනාගාර ගත කළ හිටපු රාජ්‍ය අමාත්‍ය ලොහාන් රත්වත්තේ මහතා සහ ඔහුගේ බිරිඳ අද (07) නුගේගොඩ මහේස්ත්‍රාත් අධිකරණයට ඉදිරිපත් කිරීමට රැගෙන ආවා.
නීතිවිරෝධී අයුරින් විදේශයකින් මෙරටට ගෙන්වා එකලස් කරන ලද සුඛෝපභෝගී මෝටර් රථයක් භාවිත කිරීමේ චෝදනාවට අදාළව පසුගිය 31දා හිටපු රාජ්‍ය අමාත්‍යවරයා ව අත්අඩංගුවට ගැනුණා.
එදින ගංගොඩවිල අතිරේක මහේස්ත්‍රාත්වරයා හමුවට ඉදිරිපත් කළ අවස්ථාවේදීයි ඔහුව අද දින දක්වා රක්ෂිත බන්ධනාගාරගත කළේ.
පසුව ඔහුව නොවැම්බර් මස 2 වෙනිදා බන්ධනාගාර රෝහල වෙත මාරුකර යැවූ අතර, ඇති වූ රෝගී තත්ත්වයක් හේතුවෙන් නොවැම්බර් මස 3 වනදා කොළඹ ජාතික රෝහලට ඇතුළත් කෙරුණා.
කොළඹ ජාතික රෝහලේ හදිසි ප්‍රතිකාර ඒකකයේ ප්‍රතිකාර ලබමින් සිටි හිටපු රාජ්‍ය අමාත්‍යවරයා පසුව සාමාන්‍ය වාට්ටුවක් වෙත යොමුකර බන්ධනාගාර නිලධාරීන්ගේ ආරක්ෂාව යටතේ පසුවුණා.
හිටපු රාජ්‍ය අමාත්‍ය ලොහාන් රත්වත්තේ මහතාගේ බිරිඳ වන රෂි ප්‍රභා රත්වත්තේ මහත්මියව ද මෙම සිද්ධිය සම්බන්ධයෙන් ගංගොඩවිල අධිකරණය හමුවේ පෙනී නොසිටීම හේතුවෙන් පසුගිය නොවැම්බර් මස 4 වනදා අත්අඩංගුවට ගෙන අද දින දක්වා රක්ෂිත බන්ධනාගාර ගත කර තිබුණා.
