ශ්‍රී ලංකාවෙන් බිහි වූ සුපිරි තුන් ඉරියව් ක්‍රීඩකයෙක් වන ඇන්ජලෝ මැතිව්ස් සිය ජාත්‍යන්තර ටෙස්ට් ක්‍රිකට් දිවිය අද අවසන් කළා.
ඒ, බංග්ලාදේශ කණ්ඩායම සමඟ ගාල්ලේ දී මේ වනවිට පැවැත්වෙන පළමු ටෙස්ට් ක්‍රිකට් තරගයේ දියි.
මැතිව්ස්ගේ අවසන් ජාත්‍යන්තර ටෙස්ට් ඉනිම ලකුණු අටකට සීමා වූ අතර ඔහු තම අවසන් ටෙස්ට් ඉනිමේ දී පන්දු 45කට මුහුණ දුන්නා.
මෙම සුපිරි තුන් ඉරියව් ක්‍රීඩකයා ජාත්‍යන්තර ටෙස්ට් ක්‍රිකට් තරගයක අවසන් වරට දවාගැනීමේ අවස්ථා බංග්ලාදේශ දඟ පන්දු යවන ක්‍රීඩක තයිජුල් ඉස්ලාම්ට උදාවුණා.
2009 වසරේ ජූලි මස 04 වනදා පාකිස්ථානයට එරෙහිව ගාලු ජාත්‍යන්තර ක්‍රිකට් ක්‍රීඩාංගණයේ දී ටෙස්ට් වරම් හිමිකරගත් මැතිව්ස් එතැන් සිට අද දක්වා ශ්‍රී ලංකාව වෙනුවෙන් ටෙස්ට් තරග 118 කට ක්‍රීඩා කර තිබෙනවා.
එහිදී ඔහු ලකුණු 8167ක් රැස්කරගෙන ඇති අතර, ඊට ජාත්‍යන්තර ටෙස්ට් ශතක 16ක් සහ අර්ධ ශතක 45ක් ඇතුළත්.
ටෙස්ට් පිටිය තුළ තම පිත්තෙන් හතරේ පහර 835ක් සහ හයේ පහර 89ක් මැතිව්ස් විසින් එල්ල කර තිබෙනවා.
එමෙන්ම ටෙස්ට් පිටිය තුළ රතු පන්දුවෙන් ද දස්කම් දැක්වූ මැතිව්ස් ජගත් ටෙස්ට් පිටියේ කඩුලු 33ක් දවාගෙන ඇති අතර, රැකගෙන ඇති උඩ පන්දු සංඛ්‍යාව 78ක්.
ශ්‍රී ලංකාව වෙනුවෙන් වැඩිම ටෙස්ට් ලකුණු සංඛ්‍යාවක් රැස්කළ පිතිකරුවන් අතර මැතිව්ස් තුන්වන තැන පසුවන්නේ කුමාර් සංගක්කාරට සහ මහේල ජයවර්ධනට පමණක් දෙවැනි වෙමින්.
ශ්‍රී ලංකා ක්‍රිකට් සොයාගත් වටිනාම සම්පතක් වන ඇන්ජලෝ ඩේවිස් මැතිව්ස් ශ්‍රී ලංකා ටෙස්ට් ක්‍රිකට් ක්‍රීඩාව වෙනුවන් ලබාදුන් ජයග්‍රහණ සහ සිදුකළ කැපකිරීම් තවත් වසර ගණනාවක් ශ්‍රී ලංකා ප්‍රේක්ෂකයින්ගේ මතයන් තුළ රැඳෙනු ඇති
.
