බංග්ලාදේශයේ ඇතැම් කර්මාන්තශාලාවල සේවකයන් අඛණ්ඩ වැඩවර්ජනයන් හේතුවෙන් ඇඟලුම් ආයතන ඇතුළු කර්මාන්තශාලා 219ක් වසා දමා ඇති බව විදෙස් මාධ්‍ය වාර්තා කරනවා.
දීමනා රැසක් ඉහළ දමන ලෙස පාලනාධිකාරියට බල කරමින් මෙම සේවක සේවිකාවන් විරෝධතාවයේ නිතර වී තිබුණා.
ඒශියා නිවුස් නෙට්වර්ක් වෙබ් අඩවිය පෙන්වා දෙන්නේ, මෙම වැඩවර්ජන හේතුවෙන් කර්මාන්තශාලා 86ක් දින නියමයකින් තොරව වසා දමා ඇති බවයි.
තවත් කර්මාන්ත ශාලා 133ක සේවක සේවිකාවන්ට විරෝධතා වැළැක්වීම සඳහා පොදුවේ නිවාඩු දින ප්‍රකාශයට පත් කර තිබෙනවා.
මෙලෙස විරෝධතා උත්සන්න වුවද, ඩකා නගරයේ කර්මාන්තශාලා 88ක නිෂ්පාදන කටයුතු මෙහෙය වීමට එහි පාලනාධිකාරිය කටයුතු කර තිබුණා.
සාකච්ඡා මාර්ගයෙන් අර්බුදය විසඳා ගැනීමට ප්‍රාදේශීය දේශපාලඥයින් සම්බන්ධ කමිටු කිහිපයක් අශුලියාවේ පිහිටුවා ගත්ත ද කර්මාන්ත හිමියන් තම කර්මාන්ත ශාලාවල ආරක්ෂාව පිළිබඳව කනස්සල්ලෙන් පසුවන බවයි වැඩිදුරටත් විදෙස් මාධ්‍ය සඳහන් කරන්නේ.
හැකි ඉක්මනින් කර්මාන්තශාලා නැවත ආරම්භ නොකළහොත් නුදුරු අනාගතයේ දී මෙම අංශය ගැඹුරු අර්බුදයකට මුහුණ දිය හැකි බව එරට බලධාරීන් පවසනවා.
විරෝධතා හේතුවෙන් ඇතිවන ප්‍රචණ්ඩ ක්‍රියා මැඩපැවැත්වීමට අතිරේක පොලිස් කණ්ඩායම් යොදවා ඇති බවයි විදෙස් මාධ්‍ය සඳහන් කරන්නේ.
