සිරියාවට තුර්කියට බලපෑ භූ කම්පනයෙන් කඩා වැටුණු ගොඩනැගිලි සුන්බුන් යට පැය 90කට අධික කාලයක් සිර වී සිටි අලුත උපන් බිළිදෙකු සහ මවක් බේරා ගැනීමට සහන සේවකයින්ට හැකි වී තිබෙනවා.
යගේෂ් නම් වූ මෙම බිළිඳාගේ වයස දින 10ක්. දරුවා බේරා ගන්නා අවස්ථාවේ ඡායාරූප සහ දර්ශන විදෙස් මාධ්‍ය වාර්තාකර තිබුණේ එය ආශ්චර්යක් ලෙස විස්තර කරමින්.
ඒ, භූ කම්පනය සිදු වී දින 4කට පසු අධික ශ්‍රීත කාලගුණය මධ්‍යයේ තවදුරටත් සුන්බුන් යට ජීවතුන් අතර පිරිස් සිටිය හැකි බවට තැබූ බලාපොරොත්තු හීන වී තිබීම හේතුවෙන්.
භූ කම්පනයෙන් විපතට පත් වූවන් බේරා ගැනීමේ මෙහෙයුම් තවදුරටත් අඛණ්ඩව ක්‍රියාත්මකයි.
පැය 90කට පසු බේරාගත් මෙම බිළිදාගේ සහ මවගේ සෞඛ්‍ය තත්ත්වය පිළිබඳ මෙතෙක් නිල වාර්තා කිසිවක් ලැබී නැහැ.
මෙම සිද්ධිය වාර්තා වූයේ, සහන සේවකයෙකු විසින් මවගේ මව් කුසට සම්බන්ධ වූ පෙකණිවැලද සමඟ බේරාගත් ‘ආයා’ හෙවත් අරාබි භාෂාවෙන් “ආශ්චර්යය” ලෙස හඳුන්වන බිළිඳිය හදාවඩා ගැනීම සඳහා ලොව පුරා ලක්ෂ ගණනක් ඉදිරිපත් වෙමින් ඇති පසුබිමකයි.
පසුගිය සඳුදා ඇතිවූ දරුණු භූ කම්පනයෙන් මේවනවිට ජීවිතක්ෂයට පත්ව ඇතැයි තහවුරු වී ඇති පිරිස 21,000කට අධිකයි.
දශක ගණනාවකට පසු ඇති වූ මාරාන්තික භූමිකම්පාව හේතුවෙන් ශීත ඍතුවේ මැද භාගයේ නිවාස අහිමි වූ ලක්ෂ සංඛ්‍යාත ජනයා සීතල, කුසගින්න සහ බලාපොරොත්තු සුන්වීම හමුවේ දැඩි පීඩාවන්ට පත්ව සිටිනවා.
අද Hatay හි දී, Asya Donmez නම් හත් හැවිරිදි දැරිය පැය 95 කට පසු බේරාගෙන රෝහල් ගත කර ඇති බව තුර්කියේ රාජ්‍ය මාධ්‍ය වාර්තා කළා.
ව්‍යසනයෙන් දින හතරක් මේ වන විට ගතවී ඇති අතර සීතල කාලගුණය මධ්‍යයේ තවත් දිවි ගලවා ගත් පිරිස් සොයා ගැනීමේ බලාපොරොත්තු හීන වෙමින් පවතිනවා.
කෙසේ වෙතත්, භූමිකම්පාවෙන් පීඩාවට පත් වූ තුර්කිය සහ අසල්වැසි සිරියාව යන දෙරටෙහිම සෙවීම් සහ ගලවා ගැනීමේ ප්‍රයත්නයන් අඛණ්ඩව ක්‍රියාත්මකයි.
විදෙස් වාර්තා පෙන්වා දෙන්නේ බොහෝ පිරිසකට නිවාස අහිමි වී ඇති අතර නවාතැන්, ජලය, ඉන්ධන සහ විදුලිය නොමැති වීම හමුවේ ද්විතියික ව්‍යසනයක් පිළිබඳ සැකයක් ද පවතින බවයි.
තුර්කි ජනාධිපති Recap Tayyip Erdogan මෙම කම්පනය සියවසේ ව්‍යසනය ලෙස විස්තර කර තිබෙනවා.
මෙම සියවසේ හත්වන මාරාන්තික ස්වාභාවික ව්‍යසනය ලෙසට යි මෙම භූ කම්පනය ශ්‍රේණිගත කර ඇත්තේ.
