රෝගී තත්ත්වයේ පසුවන ප්‍රවීණ ගායන ශිල්පී ඉෂාක් බෙග් මහතාට මූල්‍යම ආධාර ලබා ගැනීමට යැයි පවසමින් ප්‍රසිද්ධ මාධ්‍යවේදියෙකුගේ නම භාවිත කරමින් විදෙස් රටවල සිටින ශ්‍රී ලාංකික පුද්ගලයන්ගෙන් වංචා සහගතව මුදල් ලබා ගැනීමට තැත් කළ බව කියන සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් කසුන් කාංචන දසනායක මහතා මුල්ලේරියාව පොලිසියට නියෝග කර තිබෙනවා.
ප්‍රසිද්ධ මාධ්‍යවේදියෙකු විසින් කරන ලද පැමිණිල්ලක් සම්බන්ධයෙන් විමර්ශන සිදුකර අධිකරණයට කරුණු වාර්තා කිරීම සඳහා නියෝගයක් ලබාදෙන ලෙසට මුල්ලේරියාව පොලිසිය අද (30) කළ ඉල්ලීමත් සලකා බලමින් අධිකරණයෙන් එසේ නියෝග කළා.
කිසියම් පුද්ගලයකු තමන් අදාළ සුප්‍රසිද්ධ මාධ්‍යවේදියා බව පවසමින් විදෙස් රටක සේවයෙහි නියුතු අයකුට කතා කර රෝගී තත්ත්වයේ පසුවන ප්‍රවීණ ගායන ශිල්පි ඉෂාක් බෙක් මහතාට මූල්‍ය ආධාර එකතු කිරීම වෙනුවෙන් ආරම්භ කර ඇති “ඉෂාක්ට කෝටියක්” වැඩසටහන සඳහා මූල්‍ය ආධාර ලබාදෙන ලෙස ඉල්ලා ඇති බවත් එම විදෙස් ජාතික ශ්‍රී ලාංකිකයකු තමන්ට ඒ බව දැනුම් දී ඇති බව අගතියට පත් පාර්ශ්වය පැමිණිල්ලේ සඳහන් වන බව ද පොලිසිය අධිකරණය හමුවේ පැවසුවා.
මෙම මාධ්‍යවේදියාගේ නම භාවිතා කරමින් කතා කළ සැකකාර පුද්ගලයා මුදල් බැර කිරීම සඳහා එම විදෙස්ගත ශ්‍රී ලාංකිකයාට ගිණුම් අංකයක් පවා ලබා දී ඇති ඇති බව ද පොලිසිය අධිකරණයට දැන්වූවා.
රෝගී තත්ත්වයෙන් පසුවන ඉෂාක් බෙග් මහතාට මූල්‍ය ආධාර එකතු කිරීම වෙනුවෙන් ආරම්භ කර ඇති “ඉෂාක්ට කොටියක්” වැඩසටහන සඳහා මූල්‍ය ආධාර ලබාදෙන ලෙසට තමන් කිසිවෙකුට දැනුම් දී නොමැති බවත් එවන් තත්ත්වයක් තුළ තමන්ගේ නම ව්‍යාජ ලෙස භාවිතා කරමින් කිසියම් පුද්ගලයෙකු හෝ කණ්ඩායමක් මූල්‍ය ජාවාරමක නිරතව සිටින බව පෙනෙන්නට ඇති බැවින් ඒ පිළිබඳව විමර්ශනයක් සිදු කරන ලෙස අගතියට පත් පාර්ශ්වය එම පැමිණිල්ල මගින් වැඩිදුරටත් ඉල්ලා ඇති බව ද පොලිසිය අධිකරණය හමුවේ පැවසුවා.
wpDiscuz
