පැය 48ක් පුරා පැවති තැපැල් සේවක වර්ජනය ඊයේ මැදියම් රාත්‍රියෙන් අවසන් කෙරුණා.
ඒකාබද්ධ වෘත්තීය සමිති පෙරමුණ සඳහන් කළේ; මෙම වැඩ වර්ජනය නවතන්නේ; ආණ්ඩුව සිය තීරණ හකුළාගන්නේ නම් පමණක් බවයි.
ඊට ආණ්ඩුව අපොහොසත් වුවහොත්, ඉදිරියේ දී මීට වඩා පියවර ගන්නා බව ද තැපැල් ඒකාබද්ධ වෘත්තීය සමිතිය අවධාරණය කර සිටියා.
මේ අතර නුවරඑළිය ප්‍රධාන තැපැල් කාර්යාලය සංචාරක හෝටලයක් ලෙස පවත්වාගෙන යාම සඳහා ඉන්දියන් සමාගමකට ලබාදීමට විරෝධය පාමින් නුවරඑළිය නගර මධ්‍යයේ දැවැන්ත උද්ඝෝෂණයක් ඊයේ පස්වරුවේ පැවැත්වුණා.
අප ප්‍රාදේශීය වාර්තාකරු පැවසුවේ; නුවරඑළිය දිස්ත්‍රික් ලේකම් කාර්යාලයේ දී පසුගිය (04) දින පැවැති විශේෂ දිස්ත්‍රික් සම්බන්ධීකරණ කමිටුවේ දී ‘තැපැල්පතිවරයා තනතුරෙන් ඉවත් කරනවා’ යනුවෙන් බියවද්දා නුවරඑළිය තැපැල් කාර්යාලය ඉන්දියන් සමාගමකට ලබාදීමට එකඟතාව ලබාගෙන ඇති බවයි.
ඊට විරෝධය පාමිනුයි මෙම විරෝධතාව ඊයේ පැවැත්වුණේ.
උද්ඝෝෂණයට සහභාගී වූ පිරිස කියා සිටියේ ජනාධිපතිවරයා ප්‍රමුඛ ආණ්ඩුව නුවරඑළිය තැපැල් කාර්යාලය අත්තනෝමතික ලෙස ඉන්දියානු සමාගමකට හෝටලයක් පවත්වාගෙන යෑම සඳහා විකිණීමට ගෙන ඇති තීරණය හකුළා ගන්නා තුරු මෙම උද්ඝෝෂණය අඛණ්ඩ ව ක්‍රියාත්මක කරන බවයි.
වර්තමාන ජනාධිපතිවරයාගේ මුදල් සෙවීමේ ක්‍රියාපටිපාටිය තුළ සුලබ වශයෙන් දක්නට ලැබෙන ක්‍රියාවක් ලෙස රටේ දේපළ විකුණා දැමීම හැඳින්විය හැකි බව ද උද්ඝෝෂකයින් කියා සිටියා.
ජනතාවට කිසිදු වැඩකට නැති දේපොළ ගණනාවක් නුවරඑළිය නගරයේ ඇති බවත්; ඒ අතර නුවරඑළිය ජනාධිපති මැදුර ආදිය හැඳින්විය හැකි බව ද ඔවුන් පෙන්වාදෙනවා.
ජනතාවට හෝ රටට හෝ කිසිදු ආදායමක් ගෙන නොදෙන නුවරඑළිය ජනාධිපති මැදුර මෙලෙස හෝටලයක් කරන ලෙස ලබා දෙන ලෙසත්, ජනතාවට සහ රටට වැඩක් ඇති තැපැල් කාර්යාලයට එවැනි බලපෑම් ඇති නොකරන ලෙස ද විරෝධතාකරුවන් වැඩිදුරටත් ඉල්ලා සිටිනවා.
මෙම උද්ඝෝෂණයට ශ්‍රී ලංකාව පුරා ක්‍රියාත්මක වන ප්‍රධාන දේශපාලන පක්ෂ නියෝජනය කරන තැපැල් හා විදුලි සංදේශ වෘත්තීය සමිති නියෝජිතයන්, තැපැල් සේවකයන්, රාජ්‍ය සේවක වෘත්තීය සමිති නියෝජිතයන් , ස්වේච්ඡා සංවිධාන නියෝජිතයන් , නුවරඑළියෙ ඒකාබද්ධ වෙළෙඳ සංගමයේ සමස්ත ව්‍යාපාරික ප්‍රජාව,
නීතිඥ සංගම් නියෝජිතයන් හා සමාජ ක්‍රියාකාරීන් සහ ප්‍රදේශවාසීන් විශාල පිරිසක් එක් ව සිටි බවයි අප ප්‍රාදේශීය වාර්තාකරු පැවසුවේ.
