බංග්ලාදේශ ක්‍රිකට් ක්‍රීඩක තමීම් ඉක්බාල් ජාත්‍යන්තර ක්‍රිකට් පිටියෙන් සමුගැනීම නිවේදනය කර තිබෙනවා.
මෙය ඔහු සිය වෘත්තීය ජීවිතයට සමුදුන් දෙවන අවස්ථාව මෙට බවටයි වාර්තා වුණේ.
මීට පෙර ඉක්බාල් 2023 ජූලි මාසයේ දී ජාත්‍යන්තර ක්‍රිකට් පිටියෙන් විශ්‍රාම යන බවට නිවේදනය කර; පැය 24ක් ඇතුළත එම තීරණය වෙනස් කළා.
ඒ, එවකට බංග්ලාදේශ අගමැතිනි ෂෙයික් හසීනාගේ මැදිහත්වීම මතයි.
තමීම් පසුගිය බදාදා බංග්ලාදේශ තේරීම් කමිටුවට තම තීරණය දැනුම් දී ඇති අතර, එහිදී ගාසි අෂ්රෆ් හොසේන් ප්‍රමුඛ තේරීම් කමිටුව එළඹෙන චැම්පියන්ස් කුසලානය සඳහා බංග්ලාදේශ කණ්ඩායමට නැවත පැමිණෙන ලෙස ඔහුගෙන් ඉල්ලා තිබෙනවා.
නායක නජ්මුල් හොසේන් ෂැන්ටෝ ඇතුළු බංග්ලාදේශ ක්‍රීඩකයින් කිහිප දෙනෙකු ද ඔහුගෙන් සමුගැනීමේ තීරණය නැවත සලකා බලන ලෙස ඉල්ලා සිටි බවයි වාර්තා වන්නේ.
කෙසේ වෙතත් තමීම් එම ඉල්ලීම් නොසලකා හරිමින් ඊයේ සිය ජාත්‍යන්තර ක්‍රිකට් පිටියෙන් සමුගැනීම නිවේදනය කර තිබෙනවා.
සිය සමුගැනීම නිවේදනය කරමින් තමීම් ඉක්බාල් සඳහන් කළේ,
“මටත් ගෙදර රසිකයෙක් ඉන්නවා. මගේ පුතා කවදාවත් මට මේක කෙලින්ම කියලා නැහැ, නමුත් එයා එයාගේ අම්මට කීපවතාවක්ම කියලා තියෙනවා එයාගේ තාත්තා ආයෙත් ජාතික කණ්ඩායමේ ජර්සියෙන් සෙල්ලම් කරනවා දකින්න ඕන කියලා. රසිකයන් කලකිරීමට පත් කිරීම ගැන මට කණගාටුයි. මම මගේ පුතාට කිව්වා, ඔයා ලොකු වුණාම, ඔයා ඔයාගේ තාත්තාව තේරුම් ගනීවි කියලා.” යනුවෙන්.
