ජනාධිපති අපේක්ෂත්වය ලබාදීම සඳහා මහජන උපයෝගිතා කොමිෂන් සභාවේ හිටපු සභාපති ජනක රත්නායක මහතාගෙන් රුපියල් කෝටි තුනක අල්ලස් මුදලක් ඉල්ලා සිටි බව කියන සිද්ධියට අදාළව නැවත කරුණු පැහැදිලි කිරීමේ වාර්තාවක් අධිකරණයට ඉදිරිපත් කරන ලෙස කොළඹ ප්රධාන මහේස්ත්රාත් තනුජා ලක්මාලි මහත්මිය අද (25) අල්ලස් හා දූෂණ විමර්ෂණ කොමිසමට නියෝග කළා.
සැකකාර පාර්ශ්වය වෙනුවෙන් අධිකරණයේ පෙනී සිටි නීතිඥ මෛත්රී ගුණරත්න මහතා ඇතුළු නීතිඥවරුන් පිරිසක් කරන ලද ඉල්ලීමකට අනුව අධිකරණයෙන් එසේ නියම වුණා.
තම සේවාදායකයන් අත්අඩංගුවට ගෙන ඇත්තේ නිවැරදි ආකාරයට නොවන බවත්, අල්ලස් චෝදනාවකට පුද්ගලයෙක් අත්අඩංගුවට ගන්නකේ නම් පළමුව 2003 අංක 09 දූෂණ හා චෝදනා පනතේ 2 වගන්තියට ප්රකාරව පැමිණිල්ල ලැබුණු පසුව මූලික පරීක්ෂණය කර තහවුරු කර ගැනීමෙන් පසුව විමර්ශන කටයුතු සිදු කළ යුතු බව ද නීතිඥ මෛත්රී ගුණරත්න මහතා අධිකරණයට පෙන්වා දුන්නා.
අල්ලස් හෝ දූෂණ විමර්ශන කොමිසමේ නිලධාරීන් විසින් එලෙස ක්රියා නොකර තම සේවාදායකයන් අත්අඩංගුවට ගැනීමට ක්රියා කිරීම පිළිබඳ ව නැවත විමර්ශනයක් කරන ලෙස නීතිඥවරයා අධිකරයෙන් ඉල්ලා සිටියා.
එම සිද්ධියට අදාළව එක්සත් ලංකා පොදුජන පක්ෂයේ සභාපතිවරයා වන නිහාල් ප්රේම කුමාර හා ලේකම් වන රුවන්තිලක ප්රේදුරු ආරච්චි යන අයවලුන් අත්අඩංගුවට ගෙන රක්ෂිතව බන්ධනාගාර ගත කර තිබූ අතර ඔවුන් මේ වන විට ඇප මත මුදාහැර තිබෙනවා.
එක්සත් ලංකා පොදුජන පක්ෂයෙන් ජනක රත්නායක මහතාට අපේක්ෂකත්වය දීමට මෙම සැකකරුවන් අල්ලස් ඉල්ලා ඇති බවට අල්ලස් දූෂණ නාස්තියට එරෙහි පුරවැසි බලය සංවිධානයේ සභාපති කාමන්ත තුෂාර මහතා කළ පැමිණිල්ලකට අනුව මෙම විමර්ශන කටයුතු ආරම්භ කළ බව අල්ලස් කොමිසම අධිකරණයට කරුණු දැක්වූවා.
මොවුන් වැලිකඩ ප්ලාසා වෙළෙඳ සංකීර්ණයේ දී මුදල් ලබාගන්නා අවස්ථාවේ දී අත්අඩංගුවට ගත් බව ද අල්ලස් හා දූෂණ විමර්ෂණ කොමිසම අධිකරණයට දැනුම් දී තිබුණා.
සැකකරුවන්ට මුදල් ලබා ගැනීමට සෙසු සැකකරුවන් ආධාර අනුබල ලබා දී ඇති බව ද අල්ලස් කොමිසම අධිකරණයට කරුණු දක්වමින් සඳහන් කළා.
විත්තිකාර පාර්ශවය වෙනුවෙන් පෙනී සිටි නීතිඥවරයා අධිකරණයට කරුණු දක්වනු දක්වමින් කියා සිටියේ තම සේවාදායකයන් දෙදෙනාට අසත්ය චෝදනාවක් නගා එම පක්ෂයේ කිර්තී නාමයට ද හානියක් සිදුකර ඇති බවයි.
ඒ අනුව ඉදිරිපත් වූ කරුණු සැලකිල්ලට ගත් අධිකරණය සිද්ධියට අදාළ නැවත කරුණු පැහැදිලි කිරීමක් කර වාර්තාවක් අධිකරණයට ඉදිරිපත් කරන ලෙස නියෝග කළා.
