ඉන්දියාව සහ බ්‍රිතාන්‍යය අතර නිදහස් වෙළඳ ගිවිසුම අද සිට බලාත්මක වෙයි

ලොව පස්වැනි සහ හයවැනි විශාලතම ආර්ථිකයන් හිමි ඉන්දියාව සහ බ්‍රිතාන්‍යය අතර ඓතිහාසික නිදහස් වෙළඳ ගිවිසුම අද (15) සිට නිල වශයෙන් ක්‍රියාත්මක වීම ආරම්භ වුණා.

බ්‍රිතාන්‍යය යුරෝපා සංගමයෙන් ඉවත් වීමෙන් පසු එරට ඉතිහාසයේ අත්සන් කරන ලද විශාලතම සහ ආර්ථික වශයෙන් වැදගත්ම ද්විපාර්ශ්වික ගිවිසුම මෙය වන අතර, මේ හරහා බ්‍රිතාන්‍යය වෙත අපනයනය කරන ඉන්දියානු භාණ්ඩවලින් 99%කට සහ ඉන්දියාවට ආනයනය කරන බ්‍රිතාන්‍ය භාණ්ඩවලින් 90%කට පනවා තිබූ බදු සම්පූර්ණයෙන්ම ඉවත් කිරීම හෝ සීමා කිරීම සිදුවේ. මෙමඟින් දිගුකාලීනව බ්‍රිතාන්‍යයේ ද.දේ.නි පවුම් බිලියන 4.8කින් සහ ඉන්දියාවේ ද.දේ.නි පවුම් බිලියන 5.1කින් වාර්ෂිකව වර්ධනය වනු ඇතැයි ගණන් බලා තිබෙනවා.

මෙතෙක් කලක් බංග්ලාදේශය සහ පාකිස්තානය වැනි රටවලින් බ්‍රිතාන්‍යයට තීරුබදු රහිතව රෙදිපිළි අපනයනය කළද, ඉන්දියාවට 12%ක බද්දක් ගෙවීමට සිදුවීම නිසා අවාසිදායක තත්ත්වයක් පැවතුණා.

නමුත් නව ගිවිසුම යටතේ එම බදු ඉවත් වන බැවින් බ්‍රිතාන්‍යයේ රෙදිපිළි, ඇඟලුම් සහ පාවහන් වෙළඳපොළ තුළ ඉන්දියාවේ කොටස ඉදිරි කාලයේදී දෙගුණයකින් (6% සිට 12% දක්වා) ඉහළ යනු ඇතැයි CareEdge පර්යේෂණ ආයතනය පෙන්වා දෙනවා.

රෙදිපිළි ක්ෂේත්‍රයට අමතරව මෙම ගිවිසුම බ්‍රිතාන්‍ය මත්පැන් නිෂ්පාදන සමාගම්වලට ද විශාල පෙරළියක් වනු තිබෙනවා.

ඉන්දියාව විසින් බ්‍රිතාන්‍යයේ ‘ස්කොච් විස්කි’ (Scotch whisky) සඳහා පනවා තිබූ 150%ක සුවිශාල රේගු බද්ද ක්ෂණිකව 75% දක්වා අඩුවන අතර, ඉදිරි වසර 10 ඇතුළත එය ක්‍රමයෙන් 40% දක්වා පහත හෙළීමට නියමිතයි.