කොළඹ වරාය ආසන්න මුහුදේ දී ආපදාවට ලක් වී මේවන විට ගිලෙමින් පවතින එක්ස්ප්රස් පර්ල් නෞකාව අයත් සමාගමවන “එක්ස්ප්රස් ෆීඩර්ස්”, ශ්රී ලංකාවාසීන්ගෙන් සමාව අයැද සිටිනවා.
එක්ස්ප්රස් ෆීඩර්ස් සමාගමෙහි ප්රධාන විධායක නිලධාරී ෂ්මුවෙල් යොස්කොවිට්ස් මහතා “චැනල් නිවුස් ඒෂියා” රූපවාහිනී නාලිකාව සමග සම්බන්ධ වෙමින් මේ බව ප්රකාශ කළා.
ශ්රී ලංකාවාසීන්ගේ ජන ජීවිතයට සහ පරිසරයට සිදුවූ දෙය සම්බන්ධයෙන් තමන් අතිශය කණගාටුවන බවත්, ඒ පිළිබඳව තමා සමාව අයදින බවත් ඔහු පවසනවා.
කෙසේ වෙතත් මේවන තෙක් නෞකාවෙන් තෙල් විසිරීමක් වාර්තා නොවන බව ඔහු එහි දී ප්රකාශ කොට සිටියා.
නෞකාව සහ එහි තිබූ බහාලුම් සම්පූර්ණයෙන්ම විනාශ වී යාමෙන් සිය සමාගමට වූ පාඩුව අතිමහත් බව ද ඔහු සිහිපත් කරනවා.
ශ්රී ලංකා මුහුදු තීරය පිරිසිදු කිරීමේ කටයුතුවලට ද සිය සමාගම පූර්ණ සහය ලබා දෙන බව ප්රකාශ කළ යොස්කොවිට්ස් මහතා වැඩිදුරටත් සඳහන් කළේ මුදවාගැනීමේ කණ්ඩායම් විසින් නිරන්තරයෙන් නෞකාව ආශ්රිත පෙදෙස නිරීක්ෂණය කරමින් සිටින බවයි.
ඒ හරහා තෙල් විසිරීමක් හෝ වෙනත් අහිතකර අපද්රව්ය විසිරීමක් සිදුවුවහොත් එයට ක්ෂණික ප්රතිචාර දැක්වීමට හැකිවනු ඇති බව ඔහු පවසනවා.
මේ අතර ශ්රී ලංකා වරාය වෙත නෞකාව පැමිණෙද්දී එහි තිබූ එක් කන්ටේනරයක රසායන ද්රව්ය කාන්දුවක් තිබූ බව ඔහු ප්රකාශ කළා.
එම රසායන ද්රව්ය කාන්දුව බොහෝ දුරට ගින්න හටගැනීමට හේතුව වන්නට ඉඩ ඇති බවට විශ්වාස කරන නමුත් තවමත් එය නිෂ්චිතව පැවසිය නොහැකි බව ද ඔහු සඳහන් කළා.
