වෙඩි ප්රහාරයකින් දිවි ගලවා ගත් පාර්ලිමේන්තු මන්ත්රී උද්ධික ප්රේමරත්නගේ සුවදුක් විමසීමට පාර්ලිමේන්තු මන්ත්රීවරුන් කිහිපදෙනෙකු පැමිණ තිබෙනවා.
උද්ධික ප්රේමරත්න මන්ත්රීවරයාගේ අනුරාධපුර පිහිටි පෞද්ගලික නිවසට අදාළ මන්ත්රීවරුන් මෙලෙස පැමිණ සිටි බවයි අප වාර්තාකරු සඳහන් කළේ.
රාජ්ය අමාත්ය ෂෙහාන් සේමසිංහ, සමඟි ජනබල වේගයේ මන්ත්රී රෝහන බණ්ඩාර සහ ශ්රී ලංකා නිදහස් පක්ෂයේ පාර්ලිමේන්තු මන්ත්රී දුමින්ද දිසානායක මෙලෙස උද්ධික ප්රේමරත්න මන්ත්රීවරයාගේ සුවදුක් විමසීමට පැමිණ තිබෙනවා.
මේ අතර මෙම වෙඩි තැබීමට සම්බන්ධයෙන් විමර්ශන පොලිස්පතිවරයාගේ නියෝගයෙන් අපරාධ පරීක්ෂණ දෙපාර්තමේන්තුව වෙත භාරදී ඇති බවයි පොලිසිය පැවසුවේ.
ඊයේ (17) රාත්රී 10.35 පමණ මන්ත්රීවරයාගේ නිවස ඉදිරිපිට දී මෙම වෙඩිතැබීම සිදුකර ඇති අතර, මන්ත්රීවරයා කිසියම් කටයුත්තක් සඳහා නිවසින් බැහැරට ගොස් යළි නිවසට පැමිණි අවස්ථාවේ දී මෙම වෙඩි ප්රහාරය එල්ල වී තිබුණා.
නාඳුනන පුද්ගලයෙකු විසින් එල්ල කළ මෙම වෙඩි ප්රහාරයෙන් මන්ත්රීවරයාට කිසිඳු හානියක් සිදුව නොමැති අතර, මෝටර් රථයේ වම්පැත්තේ පිටුපස අසුන ප්රදේශයට වෙඩි ප්රහාර දෙකක් එල්ල වී තිබුණා.
වෙඩි තැබීම සඳහා මිලි මීටර් 09 වර්ගයේ ගිනි අවියක් භාවිත කර තිබූ බවයි පොලිසිය සඳහන් කළේ.
ඒ, සඳහා යොදන ජීව උණ්ඩයක් සහ හිස් පතොරම් කොපුවක් වෙඩි තැබීම සිදුකළ ස්ථානයේ තිබී පොලිසිය විසින් සොයාගෙන තිබෙනවා.
මේ අතර සිද්ධියට සම්බන්ධ සැකකරුවන් හඳුනා ගැනීම සඳහා සී.සී.ටී.වී දර්ශන ඔස්සේ විමර්ශන ආරම්භකර ඇති බවයි වාර්තා වුණේ.
