තෙල්දෙණිය ප්රදේශයේ නවතා තිබූ මෝටර් රථයක් තුළ තිබී අම්පාර රෝහලේ භෞත චිකිත්සකවරියකගේ මළ සිරුරක් සොයා ගැනීමේ සිද්ධියට අදාළ ප්රධාන සැකකරු අද (24) අලුයම යාපනය ප්රදේශයේ දී අත්අඩංගුවට ගනු ලැබුවා.
පොලිසියට ලැබුණු තොරතුරක් අනුව යාපනය කොට්ඨාස අපරාධ විමර්ශන කාර්යාංශයේ නිලධාරීන් සහ වලාන දූෂණ මර්දන ඒකකයේ නිලධාරීන් විසින් ඒකාබද්ධව සිදුකළ මෙහෙයුමක දී මෙම සැකකරු අත්අඩංගුවට ගැනීමට හැකියව ලැබී තිබෙනවා.
සැකකරු වැල්ලවත්තේ සිට යාපනයේ, චාවකච්චේරිය දක්වා බසයෙන් ගමන් කරමින් සිටිය දී මෙලෙස අත්අඩංගුවට ගෙන ඇති අතර, ඔහු සමඟ ඔහුගේ බිරිඳ ද මෙහිදී අත්අඩංගුවට ගෙන ඇති අතර ඔවුන් සමඟ කුඩා දරුවෙකු ද සිට ඇති බවයි තොරතුරු වාර්තා වුණේ.
සැකකරු අත්අඩංගුවට ගන්නා අවස්ථාවේ දී ඔහු මුව ආවරණයක් පැළඳ සිට ඇති අතර, ඔහුගේ බිරිඳ මුස්ලිම් කාන්තාවක් ලෙස වෙස්වාලගෙන සිට තිබෙනවා.
මොවුන් පසුගිය දින කිහිපයේ මීගමුව, හලාවත යන ප්රදේශවල සිට ඇති බවට තොරතුරු අනාවරණය වී ඇති අතර, ඔවුන් මුහුදු මාර්ගයෙන් විදේශගත වීමට උත්සහාය දරා ඇති බවට හෙළිව තිබෙනවා.
අත්අඩංගුවට ගැනුණු සැකකාර පෙම්වතා සහ ඔහුගේ බිරිඳ වැඩිදුර විමර්ශන සඳහා නුවරඑළිය පොලීසිය වෙත භාරදීමට නියමිත බවයි පොලිසිය සඳහන් කළේ.
පසුගිය 17 වනදා තෙල්දෙණිය ප්රදේශයේ නවතා තිබූ සුදු පැහැති වැගන් ආර් වර්ගයේ මෝටර් රථයක් තුළ තිබී කාන්තා මළ සිරුරක් සොයා ගැනුණා.
මෙලෙස මරණයට පත්ව තිබුණේ, අම්පාර මහ රෝහලේ සේවය කරන භෞත චිකිත්සකවරියක් වන අතර, ඇයගේ පෙම්වතා විසින් මළ සිරුර මෝටර් රථය තුළ දමා පලාගොස් ඇති බව පොලීසිය තොරතුරු අනවරණය කරගෙන තිබුණේ.
wpDiscuz
