තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා හිටපු නීතිපති දප්පුල ද ලිවේරා ඉදිරිපත් කළ පෙත්සම සලකා බැලීමෙන් අනතුරුව අභියාචනාධිකරණය විසින් ත්‍රස්ත මර්දන කාර්යාංශය ඇතුළු වගඋත්තරකරුවන් වෙත අතුරු නියෝග 04 ක් නිකුත් කළා.
හිටපු නිතිපතිවරයා විසින් ගොනු කළ රිට් පෙත්සමක් සලකා බැලීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන විනිසුරුවරුන්ගෙන් සමන්විත අභියාචනාධිකරණ විනිසුරු මඩුල්ල විසින් මෙම අතුරු නියෝග නිකුත් කරණු ලැබුවා.
හිටපු නීතිපති ලිවේරා මහතා වෙනුවෙන් ජනාධිපති නීතිඥ රොමේෂ් ද සිල්වා ඉදිරිපත් කළ කරුණු සලකා බැලීමෙන් අනතුරුවයි අධිකරනය මෙම අතුරු නියෝග නිකුත් කරණු ලැබුවේ.
පාස්කු ප්‍රහාර සිද්ධියේ විමර්ශනයට අදාළව ප්‍රකාශයක් ගැනීම සඳහා හිටපු නීතිපති දප්පුල ද ලිවේරා අද (24) දිනයේ ද ත්‍රස්ත විමර්ශන කොට්ඨාශය වෙත කැඳවීමක් කර තිබුණා.
කෙසේ වෙතත් පසුගිය 19 සහ 21 වනදා ඔහුට ත්‍රස්ත විමර්ශන කොට්ඨාශයට පැමිණෙන ලෙස දන්වා තිබුණ ද ඔහු එම දියනවලදී ද පැමිණ සිටියේ නැහැ.
එම අවස්ථාවලදී ඔහු වෙනුවට නීතීඥවරුන් මාර්ගයෙන් කරුණු ඉදිරිපත් කර තිබුණා.
