ඇමරිකානු හිටපු ජනාධිපති ට්‍රම්ප්ට මැතිවරණ රැළියක් අතර තුර වෙඩි ප්‍රහාරය එල්ල කළ වෙඩික්කරු පිළිබඳව මේ වනවිට තොරතුරු අනාවරණය වී තිබෙනවා.
මෙලෙස වෙඩි ප්‍රහාරය එල්ල කළ වෙඩික්කරු පෙන්සිල්වේනියාවේ, බෙතෙල් පාර්ක් හි ජීවත් වූ තෝමස් මැතිව් ක්‍රොක්ස් නැමති 20 හැවිරිදි වියේ පසු වූ තරුණයෙක් බවයි තොරතුරු වාර්තා වන්නේ.
ඩොනල්ඩ් ට්‍රම්ප් ඝාතනය කිරීමට තැත් කළ මෙම තුවක්කුකරු වේදිකාවේ සිට යාර 130 කට වඩා ඈතින් පිහිටි නිෂ්පාදන කම්හලක වහලය මත ස්ථානගතව සිට මෙම ප්‍රහාරය දියත්කර ඇති බවට ආරක්ෂක අංශ අනාවරණය කරගෙන තිබෙනවා.
ඇමරිකානු රහස් ඔත්තු සේවයේ ස්නයිපර්වරුන් විසින් වෙඩික්කරුව අදාළ ස්ථානයේදීම ඝාතනය කර ඇති අතර,පසුව එම ස්ථානයේ සිදුකළ පරික්ෂා කිරීමේ දී වෙඩික්කරුගේ සිරුර අසළ AR වර්ගයේ රයිෆලයක් තිබී සොයාගෙන ඇති බවයි වාර්තා වුණේ.
රිපබ්ලිකන් ජනාධිපති අපේක්ෂක ඩොනල්ඩ් ට්‍රම්ප්ට මෙලස කෲක්ස් වෙඩි තැබුවේ ඇයි ද යන්න තවමත් අපැහැදිලි බවයි විමර්ශන නිලධාරීන් පැවසුවේ.
මේ අතර සෙනසුරාදා පෙන්සිල්වේනියා ප්‍රචාරක රැළියක දී වෙඩි ප්‍රහාරයට ලක් වූ හිටපු ජනාධිපති ට්‍රම්ප් ප්‍රතිකාර ලැබීමෙන් අනතුරුව රෝහලෙන් පිටව ගොස් තිබෙනවා.
