බේරුවල හිටපු නගර සභාපති අල්හාජ් මසාහිම් මොහොමඩ් මහතා එම ප්‍රාදේශිකයේ එක්සත් ජාතික පක්ෂයේ ප්‍රධාන සංවිධායක ධුරයට පත් කර තිබෙනවා.
අද (09) පෙරවරුවේ එම ධුරයේ නිල පත්වීමේ ලිපිය ජනාධිපති රනිල් වික්‍රමසිංහ මහතා විසින් අල්හාජ් මහතා වෙත පිරිනමනු ලැබුවා.
ශ්‍රී ලංකා පොදු ජන එක්සත් පෙරමුණ පක්ෂයේ සහයෝගයෙන් ස්වාධීනව පසුගිය පළාත් පාලන මැතිවරණයට ඉදිරිපත් වූ අල්හාජ් මසාහිම් මොහොමඩ් මහතා බේරුවල නගර සභාපති ලෙස නිල කාලය අවසන් වීමෙන් අනතුරුව පසුගිය පළාත් පාලන මැතිවරණයට ඉදිරිපත් වීමට සජිත් ප්‍රේමදාස මහතාගේ ඉල්ලීම අනුව සමගි ජන බලවේගය හා එක්වුවත් අවසානයේ ඔහුට නාමයෝජනා අවස්ථාව නොලැබුණු බවයි හෙතෙම පවසා ඇත්තේ.
ඒ හේතුවෙන් සමගි ජන බලවේගය හා කලකිරී සිටි ඒ මහතා ජනාධිපති අපේක්ෂක රනිල් වික්‍රමසිංහ මහතාට ශක්තියක් වීමට මෙම මැතිවරණයේ දී කටයුතු කරමින් එක්සත් ජාතික පක්ෂ බේරුවල ආසන සංවිධායක ධුරය භාරගත් බවයි වාර්තා වන්නේ.
මෙම අවස්ථාවට පාර්ලිමේන්තු මන්ත්‍රී රාජිත සේනාරත්න ,කළුතර හිටපු නගරාධිපති අමීර් නසීර් යන මහත්වරු ඇතුළු පිරිසක් එක්ව සිටියා.
