ශ්රී ලංකාවේ සංචාරක කර්මාන්තය නගා සිටුවීම සඳහා ක්රියාත්මක කිරීමට යෝජිත “Pekoe trail” ව්යාපෘතිය පිළිබඳ ප්රගති සමාලෝචන රැස්වීමක් ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක හා ජනාධිපති කාර්ය මණ්ඩල ප්රධානි සාගල රත්නායක මහතාගේ ප්රධානත්වයෙන් ජනාධිපති කාර්යාලයේ දී පැවැත්වුණා.
“Pekoe trail” ව්යාපෘතිය යටතේ කිලෝමීටර් 300ක පමණ සංචාරක මංපෙතක් ඇති කිරීමට බලාපොරොත්තු වන අතර මෙම ව්යාපෘතියට ගෝලීය වශයෙන් ඉමහත් ප්රසිද්ධියක් ලැබී ඇති බැවින් එය ශ්රී ලංකාවේ තේ කර්මාන්තයේ දියුණුවට විශාල පිටිවහලක් වනු ඇති බවයි මෙම අවස්ථාවට එක් වූ Pekoe trail කණ්ඩායම පැහැදිළි කළේ.
එමෙන්ම මෙතෙක් ශ්රී ලංකාව සංචාරක ගමනාන්තයක් ලෙස නොසළකන සංචාරකයින් ආකර්ෂණය කර ගැනීමට මෙම ව්යාපෘතිය උපකාරී වනු ඇති බව ද ඔවුන් පෙන්වා දී තිබෙනවා.
මෙහිදී අදහස් දක්වමින් සාගල රත්නායක මහතා සඳහන් කළේ ශ්රී ලංකාවට ඉතා වැදගත් ව්යාපෘතියක් ලෙස මෙම ව්යාපෘතිය වෙත ජනාධිපති රනිල් වික්රමසිංහ මහතාගේ විශේෂ අවධානයක් යොමුව ඇති බවයි.
එබැවින් මෙම ව්යාපෘතිය ක්රියාත්මක කිරීමේදී පැන නැගී ඇති නීතිමය හා අනෙකුත් ගැටළු පිළිබඳ අදාළ පාර්ශ්ව සමඟ සාකච්ඡා කර විසඳුම් ලබා ගත යුතු බවත් මෙම ව්යාපෘතිය සාර්ථක කර ගැනීමට සාමූහිකත්වයෙන් කටයුතු කිරීම වැදගත් බවත් සාගල රත්නායක මහතා ප්රකාශ කළා.
ඒ අනුව මෙම ව්යාපෘතිය හා සම්බන්ධ ප්රාදේශීය වතු සමාගම් සහ අනෙකුත් රේඛීය ආයතනවල නියෝජිතයින් සමඟ සාකච්ඡා කර කඩිනම් විසඳුම් ලබා ගැනීමට කටයුතු කරන ලෙසයි සාගල රත්නායක මහතා අදාළ නිලධාරීන්ට උපදෙස් දී ඇත්තේ.
