LPL ඉතිහාසය අලුත් කළ පැතුම් – කැන්ඩිවරුන්ට දැවැන්ත ඉලක්කයකුත්

මෙවර ලංකා ප්‍රීමියර් ලීග් තරගාවලියේ මෙතෙක් පැවති තරගවල දී ක්‍රීඩකයෙකු රැස් කළ ඉහළ ම ලකුණු සංඛ්‍යාව රැස් කරන්නට ජැෆ්නා කින්ග්ස් කණ්ඩායමේ පැතුම් නිස්සංක අද (09) සමත් වුණා.

ඒ මේ වනවිට දඹුල්ල ක්‍රීඩාංගණයේ දී කැන්ඩි ෆැල්කන්ස් කණ්ඩායමට එරෙහිව පැවැත්වෙන තරගයේ දී විශිෂ්ට සහ වේගවත් ශතකයක් ලබා ගනිමින්.

පැතුම් දැවී යන විට ඔහු පන්දු 59කට ලකුණු 119ක් ලබා සිටියා.

ඊට දැවැන්ත හයේ පහර 04ක් සහ අලංකාර හතරේ පහර 16ක් ද ඇතුළත්.

පැතුම් දැවී යන විට ජැෆ්නා ලකුණු පුවරුව දැක්වුණේ පන්දුවාර 17යි එක් පන්දුවක් අවසානයේ ලකුණු 202ක් ලෙසින්.

දසුන් ශානක යොමු කළ පන්දුවකට හයේ පහරක් එල්ල කිරීමට දැරූ උත්සාහය අසාර්ථක වී, කමිඳු මෙන්ඩිස් විසින් එම පන්දුව රැක ගැනීමත් සමග පැතුම් දැවී ගියා.

ඒ අනුව ජැෆ්නා කින්ග්ස් කණ්ඩායම පන්දුවාර 20 අවසානයේ දී කඩුලු 07ක් දැවී දැවැන්ත ලකුණු 224ක් නිර්මාණය කිරීමට සමත් වුණා.

Rilee Rossouw ලකුණු 46ක් ද කුසල් මෙන්ඩිස් ලකුණු 26ක් ද රැස් කරගැනීමට සමත් වුණා.

කඩුලු බිඳ දැමීමේ දී දසුන් ශානක, දුෂ්මන්ත චමීර සහ රමේෂ් මෙන්ඩිස් කඩුලු 02ක බැගින් බිඳ දැමුවා.

එමෙන්ම ලංකා ප්‍රීමියර් ලීග් ඉතිහාසයේ කණ්ඩායමක් රැස් කළ වැඩිම ලකුණු සංඛ්‍යාවට ද මීට පෙර හිමිකම් කියා ඇත්තේ ජැෆ්නා කින්ග්ස් කණ්ඩායමයි.

ඒ 2022 වසරේ කඩුලු 04කට ලකුණු 240ක් ලබා ගනිමින් වීම ද විශේෂත්වයක්.

තරගය ජය ගැනීමට නම් කැන්ඩි ෆැල්කන්ස් කණ්ඩායමට පන්දු 120ක දී ලකුණු 225ක් ලබාගත යුතු වනවා.