කෙරවලපිටිය යුගදනවි විදුලි බලාගාරයේ පැන නගින ගැටලුමය තත්ත්වයන් සමථයකට ගෙනඒම සඳහා බලාත්මක වන්නේ එංගලන්ත නීතිය බව එම ගිවිසුමේ සඳහන් ව ඇති බව වාර්තා වනවා.
එම ගිවිසුමේ රහස්‍යභාවය හා ප්‍රකාශනය පිළිබඳ කරුණු ඇතුළත් 13.1 (a) වගන්තියේ දැක්වෙන්නේ ගිවිසුම අත්සන් කර වසර 02ක් ගතවන තුරු ඊට අදාළ කිසිදු පාර්ශ්වයක්, අනෙක් පාර්ශ්වයේ ලිඛිත අවසරයකින් තොරව ගිවිසුමෙහි කොන්දේසි සහ හුවමාරු කරගත් වෙනත් කිසිදු ලියකියවිල්ලක් හෝ ඊට අදාළ කරුණු හෙළි නොකළ යුතුය යන්නයි.
කෙරවලපිටිය යුගදනවි විදුලි බලාගාරයේ සියයට 40ක කොටස් අමෙරිකානු නිව් ෆෝට්‍රස් එනර්ජි සමාගමට පැවරීමට අදාළ ගිවිසුමට පසුගිය සැප්තැම්බර් 17වනදා අත්සන් තැබූ බව රජය නිවේදනය කළේ.
13.3 වගන්තියට අනුව කිසිදු පාර්ශ්වයක් අනෙක් පාර්ශ්වයේ ලිඛිත කැමැත්තකින් තොරව ගිවිසුම සම්බන්ධයෙන් වූ අදහස් හුවමාරු කරගැනීම, කොන්දේසි පිළිබඳ පුවත්පත් නිවේදන හෝ වෙනයම් හෝ නිවේදන නොකළ යුතු බවයි.
එවන් පසුබිමක ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක මහතා එම ගිවිසුමේ පිටපතක් ඊයේ පාර්ලිමේන්තුවේදී සභාගත කරනු ලැබුවා.
කෙසේවෙතත් දේශපාලන පක්ෂ ඇතුළු වෘත්තීය සමිති ඉල්ලා සිටියේ හෙළි නොකරන ලද එම ගිවිසුම හෙළි කරන ලෙසයි.
