සුම් සාකච්ජාවකදී එකවර සේවකයින් 900 දෙනෙකුව සේවයෙන් නෙරපීමේ සිදුවීමක් වාර්තා වෙනවා. මෙලෙස සේවයෙන් නෙරපා ඇත්තේ උකස් සමාගමක සේවය කරනු ලබන සේවක සේවිකාවන් පිරිසක් වීම විශේෂත්වයක්.
ඉකුත් බදාදා සුම් සාකච්ජාවක් සඳහා සිය සමාගමේ සේවක සේවිකාවන් පිරිසක් කැඳවා තිබු Better.com හි ප්‍රධාන විධායක නිලධාරී විශාල් ගාර්ග් නිවේදනය කළේ උකස් සමාගම සිය ශ්‍රම බලකායෙන් 9% ක් පමණ ඉවත් කරන බවයි.
“ඔබ මෙම ඇමතුමේ සිටින්නේ නම්, ඔබ සේවයෙන් පහකරනු ලබන අවාසනාවන්ත කණ්ඩායමේ කොටසක්, මෙම ආයතනය ඔබගේ සේවය වහාම ක්‍රියාත්මක වන පරිදි අත්හිටුවීමට තීරණය කර ඇත. ඔබගේ සේවක ප්‍රතිලාභ සහ අනෙකුත් ලියවිලි ඉදිරියේදී මානව සම්පත් අංශය විසින් ලබාදෙනු ඇති” යැයි ප්‍රධාන විධායක නිලධාරී විශාල් ගාර්ග් එම රැස්වීමේදී ප්‍රකාශ කර ඇත.
එකවර සේවක සේවිකාවන් මේසා විශාල සංඛ්‍යාවකට රැකියා අහිමි කිරීම සම්බන්ධයෙන් විදෙස් මාධ්‍ය නැගු ප්‍රශ්න කිරීම් හමුවේ Better.com හි ප්‍රධාන විධායක නිලධාරීවරයා සඳහන් කර සිටියේ මෙම සේවකයින් සමාගමටත්, පාරිභෝගිකයින්ටත් නිසි සේවාවක් සැපයීමට අපොහොසත් වීම ඇතුළු ඔවුන්ගේ රැකියා කාර්ය සාධන සහ ඵලදායිතාව යන කරුණු සැලකිල්ලට ගනිමින් තමන්ට අකමැත්තෙන් වුවද එම තීරණයට එළඹීමට සිදුවූ බවයි.
