මැදපෙරදිග අර්බුදය හේතුවෙන් බලශක්ති මිල ඉහළ යාම සහ කටාර් රාජ්‍යයෙන් සාමාන්‍ය පරිදි ද්‍රව ස්වාභාවික වායු සැපයුම් නොලැබීම, පාකිස්තානයේ ආර්ථික ප්‍රකෘතියට දැඩි බලපෑමක් එල්ල කර තිබෙනවා.
පාකිස්තාන සංඛ්‍යාලේඛන කාර්යාංශය සඳුදා නිකුත් කළ නිල දත්ත අනුව, 2026 ජූනි මාසයෙන් අවසන් වූ මූල්‍ය වර්ෂයේ අවසන් කාර්තුවේදී එරට දළ දේශීය නිෂ්පාදිතයේ වර්ධනය සියයට දෙකක් පමණක් වුණා.
එය පෙර කාර්තුවේ වාර්තා වූ සියයට 4.42ක වර්ධනයට වඩා දෙගුණයකටත් වැඩි මන්දගාමීත්වයක් වන අතර, ආර්ථික විශේෂඥයන් අපේක්ෂා කළ සියයට 3.5ක වර්ධන අගයටද වඩා පහළ අගයක්.
වසරේ මුල් කාර්තුවල ආර්ථිකය සාපේක්ෂව යහපත් මට්ටමක පැවතියද, අවසන් කාර්තුවේදී ඉහළ බලශක්ති පිරිවැය කර්මාන්ත අංශයට දැඩි ලෙස බලපා ඇත. හෝර්මුස් සමුද්‍ර සන්ධිය හරහා නාවික ගමනාගමනයට බාධා එල්ල වීමත් සමඟ ගෑස් සහ ඉන්ධන මිල ඉහළ යාම, පාකිස්තානයේ අයවැය පීඩනයද වැඩි කර තිබෙනවා.
2026 මූල්‍ය වර්ෂයේ අවසන් කාර්තුවේදී කර්මාන්ත අංශය සියයට 4.7කින් හැකිළී ඇති අතර, කෘෂිකර්මාන්තය සහ සේවා අංශය සියයට 3.5කට වැඩි වර්ධනයක් වාර්තා කර තිබෙනවා.
ඉදිරි ශීත ඍතුවේදී පාකිස්තානයට ස්වාභාවික ගෑස් හිඟයකට මුහුණ දීමට සිදුවිය හැකි බවටද අනතුරු ඇඟවීම් කර තිබෙනවා.
