කාවන්තිස්ස ඇතාගේ මරණ සම්බන්ධයෙන් ඉදිරියේ දී ස්වාධීන විමර්ශන කණ්ඩායමක් හරහා විමර්ශනක් සිදු කිරීමට නියමිත බව පරිසර අමාත්‍ය දම්මික පටබැඳි පවසනවා.
ඇතාට ප්‍රතිකාර කිරීමේ දී යම් අත්වැරදීමක් සිදු වුණා ද නැතහොත් දැනුවත්ව සත්වයාට හානි කිරීම සඳහා යම් සිදුවීමක් සිදුවුණා ද යන්න පිළිබඳව මෙහිදී විමර්ශනය කරන බවයි අමාත්‍යවරයා සඳහන් කළේ.
ඊයේ (17) කිලිනොච්චිය ප්‍රදේශයේ දී මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළා.
මෙහිදී වැඩිදුරටත් අදහස් දක්වමින් අමාත්‍ය දම්මික පටබැඳි සඳහන් කළේ වෙනත් කිසිඳු හස්තියෙකුට මැදහත් නොවූ ආකාරයට කාවන්තිස්ස ඇතා වෙනුවෙන් පරිසර අමාත්‍යාශය සහ වනජීවී සංරක්ෂණ දෙපාර්තමේන්තුව මැදිහත්ව කටයුතු කළ බවයි.
එමෙන්ම ඇතාගේ ජීවිතය බේරාගැනීමට නොහැකිවීම ගැන කණගාටුවට පත්වන බවත් පරිසර අමාත්‍යවරයා මෙහිදී සඳහන් කළා.
එමෙන්ම දැනුම්වත්ව ඇතාට හානිකිරීමේ යම් සිදුවීමක් ඇත්නම් ඒ පිළිබඳව ද සොයාබලා දැඩි පියවර ගන්නා බවත් ඔහු පවසා සිටියා.
