ලෝක තැනැත්තන් වෙළෙඳාමට එරෙහි දිනය නිමිති කරගනිමින්, “ශ්රී ලංකාවේ තැනැත්තන් වෙළෙඳාම මර්දනය කිරීම සහ වැළැක්වීම” තේමාව කරගත් ජාතික සමුළුව ඊයේ (31) කොළඹ දී පැවැත් වුණා.
ජාතික තැනැත්තන් වෙළෙඳාමට එරෙහි කාර්ය සාධක බලකාය විසින් මෙම සමුළුව සංවිධානය කර තිබූ අතර, මෙම සමුළුවේ ප්රධාන ආරාධිත අමුත්තා ලෙස ජාතික තැනැත්තන් වෙළෙඳාමට එරෙහි කාර්ය සාධක බලකායේ සභාපති, ආරක්ෂක ලේකම් විශ්රාමික එයාර් වයිස් මාර්ෂල් සම්පත් තුයියකොන්තා එක්ව සිටියා.
සමුළුවේ ප්රධාන දේශනය පවත්වමින් ආරක්ෂක ලේකම්වරයා සඳහන් කළේ වින්දිතයන්ගේ, ආත්ම ගෞරවය සුරැකීමටත්, අයිතිවාසිකම් තහවුරු කිරීමටත්, තැනැත්තන් වෙළෙඳාමට එරෙහි ජාතික යාන්ත්රණය සක්රීය කිරීමටත්, ශ්රී ලංකාව නිරන්තරයෙන් කැපවී සිටින බවයි.
මෙවර ලෝක තැනත්තන් වෙළෙඳාමට එරෙහි දිනයේ ගෝලීය තේමාව වන “Trapped Behind the Scam” කෙරෙහි අවධානය යොමු කළ ලේකම්වරයා, සංවිධානාත්මක අපරාධ කල්ලි විසින් තාක්ෂණය අවභාවිත කරමින් ව්යාජ රැකියා අවස්ථා මගින් පුද්ගලයන් මුළා කොට, ඔවුන් සයිබර් වංචා ඇතුළු විවිධ ශ්රම සූරාකෑම්වලට බලහත්කාරයෙන් යොදවා ගැනීමේ ශීඝ්ර ප්රවණතාවක් පවතින බව පෙන්වා දුන්නා.
තවද, තැනැත්තන් වෙළෙඳාම යනු සයිබර් අපරාධ, මුදල් විශුද්ධිකරණය සහ අනෙකුත් නීති විරෝධී කටයුතු සමඟ සමීපව බැඳුණු ජාත්යන්තර අපරාධයක් බවට පත්ව ඇති බැවින්, ඒ සඳහා සමගාමී හා ඒකාබද්ධ ජාතික ප්රවේශයක ඇති අත්යවශ්යතාව ද ඔහු වැඩිදුරටත් අවධාරණය කළා.
තැනැත්තන් වෙළෙඳාම මර්දනය කිරීම උදෙසා ශක්තිමත් ජාත්යන්තර සහයෝගීතාව, කඩිනම් තොරතුරු හුවමාරුව, වින්දිතයා කේන්ද්ර කරගත් ප්රතිපත්ති සම්පාදනය, මූල්ය විමර්ශන පුළුල් කිරීම මෙන්ම, මානව හිමිකම් සුරකිමින් තාක්ෂණය වගකීම් සහගත ලෙස භාවිත කිරීම අත්යවශ්ය බව ආරක්ෂක ලේකම්වරයා මෙහිදී පෙන්වා දුන්නා.
මෙම සමුළුවේ සාකච්ඡා වූ කරුණු ප්රායෝගික ක්රියාමාර්ග බවට පත්කිරීමේ වැදගත්කම පෙන්වා දුන් ඔහු, තැනැත්තන් වෙළෙඳාම වැළැක්වීමටත්, වින්දිතයන් ආරක්ෂා කිරීමටත්, වරදකරුවන්ට නීතිය ක්රියාත්මක කිරීමටත් ශ්රී ලංකා රජය බැඳී සිටින බව තහවුරු කළා.
