ධීවර කර්මාන්තයේ නිරත සැමියෙකු මුහුදු ගොස් පැමිණෙන විට ගැබිණි බිරිඳ කොවිඩ් වැළඳී මියගොස් සිටි පුවතක් පසුගිය දා වාර්තා කළා.
එම පුවතට සම්බන්ධ වැඩිදුර තොරතුරු රැසක් ඉරිදා පුවත්පත්වල පල කර තිබෙනවා.
දරු ප‍්‍රසූතියෙන් පසු හෝමාගම රෝහලේදී මරණයට පත් වූ දීප්ති ප‍්‍රමෝදා දුලාංජලී පිළිබඳව එම වාර්තා ඇසුරින් සැකසුණු ලිපියකි මේ.
ඇය පදිංචිව සිටියේ මාරවිල උතුරු තොඩුවාව, ලූර්දු මාවතේය. දෙවන දරු ප‍්‍රසූතියට සූදානම් ව සිටි ඇයට කොරෝනා වෛරසය ආසාදනය වීම නිසා නෙවිල් ප‍්‍රනාන්දු රෝහලටත් එතැනින් හෝමාගම රජයේ රෝහලටත් ඇතුළත් කෙරිණි.
වෛද්‍යවරු ඇය පත්ව සිටින අවදානම තේරුම් ගත්හ. ඒ අනුව සිසෙරියන් සැත්කමකින් ඇයගේ දරුවා නිරුපද්‍රිතව බිහිකරන්නට ඇයට හැකිවිය. නමුත් කොරෝනා මාරයාගෙන් ගැලවෙන්නට ඇයට නොහැකි විය.
ඇයගේ තිස්වන උපන් දිනය යෙදී තිබුණු ජුනි විසි වැනිදා ම ඇය සියල්ල අතහැර නික්ම ගියාය. කොරෝනා නොවැලඳුනු සිඟිත්තියගේ මුහුණ බැලීමට වත් ඇයට නොහැකි වූවාය. අවුරුදු හතක් වයසැති වැඩිමල් පුතනුවන් තවමත් අම්මා එතැයි පාර බලනවා ඇත.
ඇගේ ධීවර රැකියාවේ නියුතු සැමියා දින පනහකට පසු නිවසට පැමිණීමේදී මෙම පුවත අසා බෙහෙවින් කම්පාවට පත් විය.
”අනේ මම මොනතරම් බලාපොරොත්තු ඇතිවද ගෙදර ආවේ. එයා ගෙදරින් එළියට වත් යන්නේ නෑ. කොහොම කොරෝනා හැදුනද කියලා හිතාගන්නවත් බෑ.
දැන් ඉතිං දරු දෙන්නයි මමයි තනිවුණා. අපි ධීවර රැකියාව කරන්නේ දින මාස ගණන් අපි ඉන්නේ ගැඹුරු මුහුදේ. අපි ගෙවල්වල නොහිටියාට ළමයින්ගේ ඉගෙනීමේ කටයුතු ඔක්කොම හොයල බලලා එයා කරනවා.
එයාගෙ උපන් දිනය දවසෙ ම එයා යන්න ගියා. මට ළඟට වත් එන්න බැරි වුණා. පුතත් එක්ක නිරෝධායනයට යන්න වෙලා. අවසන් කටයුතුවලටත් යන්න බෑ. අනේ හැමෝගෙන්ම ඉල්ලන්නේ මේවගේ දුකකට පත් වෙන්න එපා. කොරෝනා මාරාන්තිකයි. හරියට පරිස්සම් වෙන්න. නැත්නම් තමන්ගෙ ආදරණීය අයගෙන් වෙන්වෙන්න වෙයි.”
